युनिकोड
अमेरिकाका राष्ट्रपति डोनाल्ड ट्रम्पले भारत-पाकिस्तान द्वन्द्वसहित विश्वका सात युद्ध आफूले रोकेको दाबी गरेका छन्।
ह्वाइट हाउसमा पत्रकारहरूसँग कुरा गर्दै उनले भने, ‘मैले यी सबै युद्ध रोकेको छु। यीमध्ये सबैभन्दा ठूलो भारत र पाकिस्तानबीचको युद्ध हुने थियो।’
ट्रम्पले थपे, ‘भारत र पाकिस्तानबीचको युद्ध आणविक युद्धमा परिणत हुन सक्थ्यो। उनीहरूले पहिले नै ७ वटा लडाकु विमान खसालिसकेका थिए, यो धेरै भयानक थियो। अनि मैले भनेँ- के तपाईं व्यापार गर्न चाहनुहुन्छ? तपाईं लडिरहनुभयो भने हामी तपाईंसँग कुनै व्यापार गर्नेछैनौँ। तपाईंसँग यसलाई समाधान गर्न २४ घण्टा छ। त्यसपछि उनीहरूले भने- ठिक छ, अहिले कुनै युद्ध भइरहेको छैन।’
तर ट्रम्पले खसालिएका विमान भारत वा पाकिस्तानका हुन् वा दुवै देशका भन्ने कुरा स्पष्ट पारेका छैनन्।
ट्रम्पले भारत र पाकिस्तानको लडाइँ आफूले रोकेको भनेर पटकपटक दाबी गरे पनि भारतले भने यसमा कसैको हात नरहेको यसअघि नै बताइसकेको छ। यद्यपि पाकिस्तानले भने ट्रम्पलाई धन्यवाद दिएको छ।
प्रतिक्रिया