युनिकोड
अमेरिकाका राष्ट्रपति डोनाल्ड ट्रम्प र चीनका राष्ट्रपति सी चिनफिङबिच बिहीबार भएको वार्ता कुनै ठुलो व्यापार सम्झौतामा पुग्न असफल भएको छ।
अमेरिका र चीन गत वर्ष अक्टोबरमा व्यापार युद्ध रोक्न सहमत भएका थिए। अक्टोबरको सम्झौताअन्तर्गत अमेरिकाले चिनियाँ सामानमा प्रस्तावित कर वृद्धि रोकेको थियो भने चीनले दुर्लभ पृथ्वीजन्य पदार्थ निर्यातमा प्रतिबन्ध कम गरेको थियो।
ह्वाइट हाउसका अनुसार दुई नेता ‘व्यापार बोर्ड’ स्थापना गर्न सहमत भएका छन्। यसको उद्देश्य व्यापार सम्बन्ध व्यवस्थापन गर्नु हो ताकि बारम्बार कर वार्ताको आवश्यकता नपरोस्।
यद्यपि अमेरिकी अधिकारीहरू भन्छन्, ‘यो प्रणाली पूर्ण रूपमा लागु गर्नुअघि धेरै काम बाँकी छन्।’
अमेरिकाका वित्तमन्त्री स्कट बेसान्टले भ्रमणका क्रममा प्रमुख बोइङ अर्डर र अमेरिकी ऊर्जा र कृषि उत्पादन चीनले खरिद गर्नेसम्बन्धी घोषणा हुन सक्ने बताएका छन्।
बुधबारदेखि चीन भ्रमणमा रहेको ट्रम्पको टोलीमा टेस्लाका सीईओ इलोन मस्क र एनभिडियाका सीईओ जेन्सेन हुआङसहित अमेरिका धेरै जना शीर्ष व्यापारिक नेता छन्।
उल्लिखित दुवै कम्पनी अमेरिका-चीन आर्थिक सम्बन्धका महत्त्वपूर्ण घटक हुन्। टेस्ला आफ्नो सांघाई प्लान्ट र चीनमा रहेका ग्राहकमा धेरै निर्भर छ। एनभिडियाको माइक्रोचिप विश्वव्यापी एआई दौडको केन्द्रमा छ।
उन्नत कम्प्युटिङ प्रविधिमा चीनको पहुँच सीमित गर्न अमेरिकाले पहिले नै धेरै निर्यात नियन्त्रण उपाय अपनाएको छ।
जेन्सेन हुआङको उपस्थितिलाई पनि महत्त्वपूर्ण मानिएको छ, किनभने उनको नाम प्रारम्भिक प्रतिनिधिमण्डलको सूचीमा थिएन। यसले एआई र अर्धचालक चिप्समा चीनको पहुँच वार्ताको प्रमुख भाग हुन सक्छ भन्ने अनुमानलाई बढावा दिएको छ।
शुक्रबार ट्रम्प र सीले थप विषयमा वार्ता गर्ने अपेक्षा गरिएको बीबीसीले उल्लेख गरेको छ।
ह्वाइट हाउसले यात्रामा समावेश कम्पनीका शीर्ष कार्यकारीहरूको सूची सार्वजनिक गरेको छ।
जुन यसप्रकार छ:
टिम कुक (एप्पल), स्टिफन स्वार्जम्यान (ब्ल्याकस्टोन), केली ओर्टबर्ग (बोइङ), ब्रायन साइक्स (कारगिल), जेन फ्रेजर (सिटीग्रुप), हेनरी लरेन्स कल्प (जीई एयरोस्पेस), डेभिड सोलोमन (गोल्डम्यान स्याक्स), ज्याकब थाइसेन (इलुमिना), माइकल मिबाच (मास्टरकार्ड), सञ्जय मेहरोत्रा (माइक्रोन टेक्नोलोजी), जेन्सेन हुआङ (एनभिडिया), क्रिस्टियानो आमोन (क्वालकम), इलोन मस्क (स्पेसएक्स र टेस्ला), रायन म्याकइनर्नी (भिसा)।
प्रतिक्रिया