युनिकोड
कर्णाली प्रदेशमा सत्ता साझेदार दल नेकपा एमाले र नेपाली कांग्रेसको प्रदेशस्तरिय संयन्त्रको बैठक सम्पन्न भएको छ। बैठकमा सरकार संचालन, बजेट कार्यान्वयन र प्रदेश सरकार अन्तरगत खाली रहेका विभिन्न नियुक्तिका सन्दर्भमा छलफल भएको छ।
दुई दल सम्मिलित प्रदेशस्तरिय संयन्त्रको बैठकले सरकार संचालनमा गठवन्धनको मर्मअनुरुप अघि बढ्ने निष्कर्ष निकालेको छ।
बैठकमा सहमागी नेकपा एमालेका प्रदेश अध्यक्ष गुलावजंग शाहले दुई दलबिच बनेको सरकारलाई आगामी दिनमा थप प्रभावकारी बनाएर लैजाने सहमति भएको बताए। उनले एक वर्षमा सरकारले गरेका कामकारवाहीको समीक्षासँगै सरकारलाई अझ प्रभावकारी बनाउने विषयमा साझा धारणा तय भएको बताए।
कांग्रेस-एमालेबिच सत्ता साझेदारीमा खटपट भएको भनि गरिएको प्रचारमा सत्यता नरहेको समेत अध्यक्ष शाहले बताए। ‘प्रदेशका विभिन्न निकायमा खालि रहेका पदाधिकारी तत्काल नियुक्त गर्ने, सरकारलाई अझ प्रभावकारी बनाउन साझा धारणा तय गर्ने तथा सरकार सञ्चालनको एक वर्षलाई समिक्षा गर्ने दुई दलबीच सहमति भएको छ,’ अध्यक्ष शाहले भने।
बैठकमा नेपाली कांग्रेस कर्णाली प्रदेश सभापति ललितजंग शाही, नेपाली कांग्रेस संसदीय दलका नेता जीवनबहादुर शाही, मुख्यमन्त्री यामलाल डँडेल, एमाले कर्णाली प्रदेश इन्चार्ज गोरख बोगटी र अध्यक्ष गुलावजंग शाह सहभागी थिए।
प्रतिक्रिया