बहुमूल्य क्रिस्टल भन्दै ठगी गरेको आरोप ६ जना पक्राउ

कास्की प्रहरीले बहुमूल्य क्रिस्टल रहेको भन्दै प्रलोभनमा पारेर लाखौँ रुपैयाँ ठगीको आरोपमा ६ जनालाई पक्राउ गरेको छ।

जिल्ला प्रहरी कार्यालय कास्कीका अनुसार पक्राउ परेकाहरूले पोखरा महानगरपालिका-१८ का एक व्यक्तिलाई आफूहरूसँग अन्धकारमा उज्यालो दिने, पानीलाई जमाएर डल्लो बनाउने तथा फूलको कोपिलालाई तुरुन्तै फूल बनाउने अद्भूत शक्ति भएको बहुमूल्य क्रिस्टल रहेको भन्दै फोटो र भिडियो देखाएर विश्वास दिलाएका थिए।

त्यस क्रममा पीडितबाट १० लाख रुपैयाँ ठगी गरेको र पछि थप २० लाख रुपैयाँ माग्दै धम्की दिएको उजुरीका आधारमा प्रहरीले अनुसन्धान अघि बढाएको थियो।

सोही सूचनाका आधारमा इलाका प्रहरी कार्यालय शिशुवाको टोलीले पोखरा-२६, कालिकास्थानबाट ६ जनालाई पक्राउ गरेको प्रहरीको भनाइ छ। उनीहरूको साथबाट क्रिस्टलजस्तो देखिने सेतो टल्किने वस्तु एक थान, काठको फोल्डिङ बट्टा, चार्जर तथा ६ थान मोबाइल बरामद गरिएको छ।

पक्राउ परेकामाथि ठगी, आपराधिक विश्वासघात तथा आपराधिक लाभ (एक्सटर्सन) सम्बन्धी कसुरमा कास्की जिल्ला अदालतबाट तीन दिनको म्याद थप गरी अनुसन्धान भइरहेको कास्की प्रहरीले जनाएको छ।