युनिकोड
रौतहटको सदरमुकाम गौर नगर क्षेत्रमा शनिबारदेखि जारी कर्फ्यु आइतबार बिहान बसेको सर्वपक्षीय बैठकपछि पनि स्थानीय प्रशासनले जारी राखेको छ।
रौतहटका प्रमुख जिल्ला अधिकारी दिनेश सागर भुसालले स्थिति अझै संवेदनशील रहेको सुरक्षा विश्लेषणका कारण तत्काल कर्फ्यु हटाउन नसकिएको जानकारी दिए।
‘कर्फ्यु तत्काल हटाउन सकिने अवस्था छैन’, सर्वपक्षीय बैठकपछि उनले नेपालखबरसँग भने, ‘दुई समुदायबिच झडप भएको (गौर नगरपालिका-६) सबगढाका १५/२० जना (दुवै समुदायका) स्थानीयलाई अहिले दिउँसो ३ बजे बोलाएका छौँ। उनीहरूबिच अब सद्भाव कायम गर्ने, कुनै विवाद नगर्ने प्रतिबद्धता र सहमति भयो तथा यसको कार्यान्वयन सुनिश्चित हुने देखिएपछि बल्ल कर्फ्यु हटाउने विषयमा विचार गर्छौँ।’
प्रमुख जिल्ला अधिकारी भुसालकै अध्यक्षतामा आज बिहान बसेको सर्वपक्षीय बैठकले सोमबार बिहान नागरिक समाजको अगुवाइमा सबगढामा सद्भाव र्याली निकाल्नेसहित ५ निर्णय गरेको छ।
हेर्नुहोस् ५ निर्णय
१. गौर नगरपालिका वडा नं. ६ को सबगढा गाउँमा मिति २०८२ फागुन ७ गते राति ९:४५ बजे सुरु भएको विवाद सामान्य रूपले नै समाधान भइसके तापनि पुनः मिति २०८२ फागुन ८ गतेदेखि उग्र रूप लिएको हुँदा स्थानीयवासी प्रतिनिधि तथा अगुवा बसेर छबुँदे सहमति भएको बेहोरा अवगत भयो। तथापि मिति २०८२ फागुन ९ गते बिहानैदेखि परिस्थिति जटिल भएको अवस्था सिर्जना भई जिल्लाभित्र हुनसक्ने जनधनको क्षति रोक्न जिल्ला सुरक्षा समितिको निर्णयानुसार मिति २०८२।११।०९ दिउँसो १:०० बजेदेखि सुरु भएको कर्फ्युको अवस्था यथावत् रहेको अवस्थामा जिल्लामा सौहार्दपूर्ण वातावरण कायम गर्न बोलाइएको यस सर्वपक्षीय बैठकबाट सो विवादको क्रममा भएका घटनाहरूप्रति खेद प्रकट गर्दै शान्तिपूर्ण वातावरण कायम गर्न सरोकारवाला सबै पक्षले सार्वजनिक अपिल जारी गर्ने निर्णय गरियो।
२. सबगढा गाउँमा भएको विवाद समाधान गर्न सहयोगी हुने दुवै पक्षका स्थानीय भद्रभलादमी व्यक्तिहरूको उपस्थित गराई जिल्ला सुरक्षा समितिले औपचारिक/अनौपचारिक छलफल वा बैठक गरी समस्या समाधानका लागि पहल गर्ने निर्णय गरियो।
३. अन्तर्राष्ट्रिय रूपमा घटेका घटनाहरूलाई यस जिल्लाभित्रको घटना भएको भनी विभिन्न व्यक्तिहरूले सामाजि सञ्जालहरूमा अनर्गल रूपमा प्रचारप्रसार गरी शान्तिपूर्ण अवस्थामा खलल पुग्ने अवस्था देखिएमा आवश्यक कारबाही गर्ने कार्यमा सुरक्षा निकायलाई सहयोग गर्ने निर्णय गरियो।
४. सबगढा गाउँलगायत फाटफुट रूपमा कतिपय अन्य स्थानहरूमा धार्मिक सामाजिक सद्भाव बिथोल्न खोज्ने व्यक्तिहरूको सुरक्षा निकायबाट निगरानी भई नै रहेको अवस्था छ। उक्त घटनामा पक्राउ परेका व्यक्तिहरूको सम्बन्धमा सुरक्षा निकायको अनुसन्धानबाट दोषी देखिएमा र अनुसन्धान हुँदै जाँदा दोषी अन्य व्यक्तिहरू समेतलाई कानुनी दायरामा ल्याई कारबाही गर्न प्रहरी प्रशासनलाई आग्रह गर्ने निर्णय गरियो।
५. रौतहट जिल्लाभर धार्मिक, सामाजिक-सांस्कृतिक सद्भाव कायम गर्न तथा सार्वजनिक शान्ति कायम गर्न र रौतहट जिल्लाबाट धार्मिक, सामाजिक, सांस्कृतिक सद्भाव र शान्तिको सन्देश दिने उद्देश्यले भोलि मिति २०८२।११।११ गते बिहान ७:३० बजे नागरिक समाजको अगुवाइमा सरोकारवाला सबैलाई सहभागी गराई सबगढामा सद्भाव र्याली गर्ने निर्णय गरियो।
यो पनि : चुनावको मुखमा अशान्त रौतहट: किन हुन्छ पटकपटक साम्प्रदायिक झडप?
प्रतिक्रिया