संसदमा हर्क साम्पाङको गर्जनः सरकार कहाँ लुकेर बसेको छ?

श्रम, संस्कृति पार्टीका सांसद हर्क साम्पाङले लिपुलेक विवादमा सरकारले छिमेकी मुलुकसँग कुटनीतिक सम्वाद गर्न नसकेको बताएका छन्।

प्रतिनिधिसभाको सोमबारको बैठकमा बोल्दै श्रम संस्कृति पार्टीका अध्यक्ष समेत रहेका उनले राष्ट्रियता र सीमा रक्षाका सवालमा सरकारले ‘चुप्पी’ साँधेको आरोप लगाएका हुन्।

‘किन कुटनीतिक वार्ता गर्न सकेन? हस्ताक्षरबिनाको कुटनीतिक नोटका भरमा मात्र किन लुकेर बसेको छ यो सरकार?’

उनले नेपाली सेनाको परिचालन र सीमा सुरक्षाको विषयमा पनि सरकारको ध्यानाकर्षण गराए। सेनालाई सीमा रक्षामा खटाउनुको साटो सुकुम्बासी हस्ती हटाउन प्रयोग गरेको भन्दै उनले आपत्ति जनाए।

सरकारले संविधान प्रदत्त आवास र सम्मानजनक बाँच्न पाउने मौलिक हकको उल्लंघन गरेको दाबी छ। संविधान उल्लंघन गरेर सरकार असफल भइसकेको दाबी गर्दै सांसद साम्पाङले भने, ‘गरिबका भत्किएका बस्ती र बिजोग बनाइएको होल्डिङ सेन्टरहरुमा प्रधानमन्त्री जानुभएको छ कि आफ्नै कार्यालयमा लुकेर बस्नुभएको छ?’

उनले देश अभिभावकविहीन बनेको महसुस भइरहेको बताउँदै संविधान मिच्ने सरकारको अब कुनै औचित्य नरहेको बताए।