काठमाडौँ प्रहरी प्रमुखमा रमेश थापा, जेनजी आन्दोलनपछि सेट नै परिवर्तन

जिल्ला प्रहरी परिसर काठमाडौँको प्रमुखमा प्रहरी वरिष्ठ उपरीक्षक (एसएसपी) रमेश थापालाई सरुवा गरिएको छ।

प्रहरी महानिरीक्षकको सचिवालयमा कार्यरत थापालाई काठमाडौँ प्रहरी प्रमुखको जिम्मेवारी दिने निर्णय गृहमन्त्रीले बिहीबार गरेका हुन्।

यसअघिका एसएसपी विश्वराज अधिकारीलाई प्रहरी प्रधान कार्यालय सरुवा गरिएको छ। जेनजी आन्दोलनमा २३ गते अत्यधिक बल प्रयोग गरेको भन्दै प्रहरीको चौतर्फी विरोध भइरहेका बेला सरकारले काठमाडौँका एसएसपी, एसपी र डीएसपीसमेत हेरफेर गरेको हो। आधाजसो प्रहरी वृत्तका प्रमुख पनि परिवर्तन गरिएको छ। परिसरका अझै केही डीएसपी हेरफेरको तयारी भइरहेको छ।

काठमाडौँ प्रहरी प्रमुखको जिम्मेवारी पाएका थापाले यसअघि एसपी हुँदा उदयपुर र कास्कीको प्रहरी प्रमुख भएर काम गरिसकेका छन्। उनी आफ्नो ब्याचका पहिलो नम्बरका एसएसपी हुन्।

यसअघि बुधबार एसपी अपीलराज बोहरा र कुलदीप चन्दलाई पनि काठमाडौँ प्रहरी परिसरबाट सरुवा गरिसकिएको छ। नयाँ एसपीमा पवन भट्टराईलाई ल्याइएको छ। यस्तै डीएसपी सुन्दर तिवारी पनि परिसरबाट सरुवा भएका छन्।