युनिकोड
मनसुन कमजोर भएसँगै वर्षा हुने क्रम बिस्तारै घट्दै गएको छ। मौसम पूर्वानुमान महाशाखाका अनुासर हाल मनसुनी वायुको प्रभाव केही कमजोर छ भने स्थानीय वायुको प्रभाव आंशिक छ।
नेपालबाट मनसुन बाहिरिने औसत मिति अक्टोबर २ तारिख हो। यस हिसाबले देशबाट मनसुन हट्न अझै १० दिन बाँकी छ। तर यो सरदर मिति भएकाले यसमा तलमाथि पनि हुन्छ। त्यसो त यसपटक नेपालमा मनसुन हालसम्मकै छिटो औसत मिति (जुन १३ तारिख) भन्दा १५ दिन अगाडि मे २९ तारिखमै भित्रिएको थियो।
मौसम महाशाखाका अनुसार यतिबेला (सोमबार बिहान) पहाड भेगमा आंशिक बदली (आकाशमा पातलो बादल) रही देशका बाँकी स्थानमा भने मुख्यतया सफा (आकाश सफा) देखि आंशिक बदली भएको छ।
महाशाखाले आज बिहान जारी गरेको प्रक्षेपणअनुसार,
आज दिउँसो : कोसी प्रदेशलगायत बाँकी पहाड भेगमा साधारणतया बदली रही बाँकी स्थानमा आंशिक बदली रहने छ। कोसी प्रदेशका केही स्थान, बाँकी पहाड भूभागका थोरै स्थान तथा बाँकी तराई भूभागका एक-दुई स्थानमा मध्यम वर्षाको सम्भावना छ।
आज राति : कोसी प्रदेशलगायत बाँकी पहाड भेमा आंशिक बदली रही बाँकी स्थानमा मुख्यतया सफादेखि आंशिक बदली रहने छ। कोसी प्रदेशलगायत बागमती प्रदेश र गण्डकी प्रदेशका पहाड भूभागको थोरै स्थान तथा बाँकी प्रदेशका पहाड भूभागका एक-दुई स्थानमा मध्यम वर्षाको सम्भावना छ। कोसी प्रदेश र बागमती प्रदेशका पहाड भूभागका एक-दुई स्थानमा भारी वर्षाको सम्भावना छ।
मौसम महाशाखाले यहाँ 'दिउँसो' शब्द दिनभर अर्थात् साँझ ६ बजे अघिसम्मको समय र 'राति' शब्द रातभर अर्थात् साँझ ६ बजेदेखि भोलिपल्ट बिहान ६ बजेसम्मको समयका लागि प्रयोग गरेको हो।
मौसमविद्का अनुसार, २४ घण्टाभित्र १० मिलिमिटरभन्दा कम पानी पर्नुलाई हल्का वर्षा, १० देखि ५० मिलिमिटरसम्म पानी पर्नुलाई मध्यम वर्षा भनिन्छ।
अनि ५० देखि माथि १०० मिलिमिटरसम्म पानी पर्नुलाई भारी वर्षा, १०० देखि माथि २०० मिलिमिटरसम्म पानी पर्नुलाई धेरै भारी वर्षा भनिन्छ भने २०० मिलिमिटरभन्दा माथि पानी पर्नुलाई अति भारी वर्षा भनिन्छ।
यस्तै एक-दुई स्थानमा वर्षा भन्नाले सम्बन्धित प्रदेशका जुनसुकै ठाउँमा १० प्रतिशतभन्दा कम क्षेत्रफलमा पानी पर्ने सम्भावना देखिनु हो।
यदि १० प्रतिशतदेखि ३० प्रतिशतसम्मको क्षेत्रफलमा पानी पर्ने सम्भावना छ भने थोरै ठाउँमा पानी पर्न सक्छ भनिन्छ।
त्यसैगरी ३० प्रतिशतदेखि ५० प्रतिशतसम्मको क्षेत्रफलमा पानी पर्ने सम्भावना छ भने केही स्थानमा पानी पर्न सक्छ भनिन्छ।
त्यस्तै ५० प्रतिशतदेखि ८० प्रतिशतसम्मको क्षेत्रफलमा पानी पर्ने सम्भावना छ भने धेरै ठाउँमा वर्षा हुन सक्छ भनिन्छ।
यदि ८० प्रतिशतभन्दा बढी क्षेत्रफलमा पानी पर्ने सम्भावना भयो भने अधिकांश स्थानमा वर्षा हुन सक्छ भनिन्छ।
प्रतिक्रिया