युनिकोड
आज (शनिबार) इद (इद–उल–फित्र) पर्व, मुस्लिम समुदायले हर्षोल्लासका साथ मनाइरहेका छन्।
रिस, राग र द्वेष बिर्सेर आपसमा खुसीयाली साटासाट गर्दै शुभकामना आदानप्रदान गरी इद पर्व मनाइन्छ।
आज इदमा विशेष नमाज समर्पण गरिसकेपछि आशीर्वाद लिने र दिने गरिन्छ।
सो अवसरमा मिष्टान्न परिकार खाने र खुवाउने परम्परा रहिआएको छ।
इदको अवसरमा सरकारले सार्वजनिक बिदासमेत घोषणा गरेको छ। यद्यपि आज शनिबार पनि परेकाले स्वतः बिदा छ।
रोजाको अनुशासन, आत्मसंयम र श्रद्धापूर्वक गरिएको नमाजको साधनापछि मनाइने इद पर्व आत्मिक शुद्धता र आध्यात्मिक उन्नतिको प्रतीक हो। यस पर्वले मानिसलाई संयम, धैर्य र आत्मनियन्त्रणको पाठ सिकाउँछ।
यस अवसरमा आयोजना हुने ‘इफ्तार’ र सामूहिक नमाजले देश र समुदायमा एकता र सहअस्तित्वको भावना बलियो बनाउँछ।
दान र सहयोगको परम्पराले असहाय, गरिब तथा सहयोगको आवश्यकता भएकाप्रति करुणा र सहानुभूति जगाउँछ।
इदको चन्द्रमा देखेपछि ‘चाँद मुबारक’ वा ‘इद मुबारक’ भन्ने परम्परा शुभकामना मात्र होइन, आपसी सद्भाव र भाइचारा प्रकट गर्ने सुन्दर संस्कार हो।
इद–उल–फित्र धार्मिक पर्व मात्र होइन, सामाजिक सद्भाव र सांस्कृतिक ऐक्यबद्धताको प्रतीक पनि हो।
नयाँ कपडा लगाउने, नमाज पढ्ने, एक अर्कासँग गला मिलाउँदै शुभकामना आदानप्रदान गर्ने मौलिक परम्पराले सामाजिक सम्बन्धलाई अझ घनिष्ठ बनाउँछ।
विशेष परिकार बनाएर खाने-खुवाउने संस्कारले साझा खुसी बाँड्ने परम्परालाई जीवन्त राख्न सहयोग पुग्छ भने दान र सहयोगको संस्कारले समाजलाई न्यायपूर्ण र करुणामय बनाउन मद्दत गर्छ।
यस पर्वले हामीलाई भाइचारा, मेलमिलाप र सामूहिकताको मूल्यलाई आत्मसात् गर्न प्रेरणा प्रदान गर्छ।
धर्मको मूल उद्देश्य मानवता हो। कुनै पनि धर्मले विभेदलाई स्वीकार गर्दैन, बरु त्याग, पवित्रता, अहिंसा, लोकहित, विवेक र सत्कर्मलाई प्रोत्साहन गर्दछ। धर्मले मानिसलाई सत्यनिष्ठ, कर्मनिष्ठ र कर्तव्यनिष्ठ बन्न प्रेरित गर्दछ।
विपत्तिमा धर्मप्रतिको आस्था नै मानिसलाई धैर्य र साहस प्रदान गर्दछ। सद्भाव, सदाचार र समन्वय नै सभ्य समाज निर्माणका आधार स्तम्भ हुन्।
यस दृष्टिले इद–उल–फित्रले हामीलाई धार्मिक आस्था मात्र होइन, सामाजिक न्याय, समता र सहअस्तित्वको मार्गमा अघि बढ्न उत्प्रेरित गर्दछ।
हेर्नुहोस् देशका विभिन्न स्थानमा इद मनाइएका केही तस्बिर
सबै तस्बिर : रासस
प्रतिक्रिया