दूधे बालक दुई दिनदेखि बेपत्ता : अपहरणको आशंका

सिरहाको सिरहा नगरपालिका-१ निवासी प्रदीप यादवका दुई वर्षीय छोरा इशान्त मंगलबार साँझदेखि बेपत्ता भएका छन्।

आफ्नै घरको आँगनमा खेलिरहेका बेला इशान्त अचानक हराएका हुन्। उनको अपहरण भएको आशंका परिवारजनले गरेका छन्।

आफू घरभित्र खाना पकाउन गएको बेला अचानक छोरो हराएको बालककी आमा संगीता यादवले जानकारी दिइन्। हराएको छोरालाई सबैतिर खोजी गरे पनि फेला नपरेको उनले बताइन्।

जिल्ला प्रहरी कार्यालय सिरहाका प्रवक्ता प्रहरी नायब उपरीक्षक शालिग्राम शर्मा पौडेलले बालक हराएको सूचना पाएलगत्तै खोजी कार्य तीव्र पारिएको बताए।