युनिकोड
अमेरिकी नागरिकसहितको हत्यामा मुछिएर जेल सजाय भोगिरहेका कुख्यात फ्रान्सेली नागरिक चार्स शोभराज केन्द्रीय कारागार सुन्धाराबाट रिहा हुने भएका छन्।
पछिल्लो समय अमेरिकी नागरिकको हत्या र केन्द्रीय कारागारमै रहेका जाली नोटसहितका आपराधिक कार्यमा संलग्न युनुस अन्सारीमाथिको गोलीकाण्डको सजाय भोगिरहेका उनलाई ज्येष्ठ नागरिकलाई दिइने सुविधाअनुसार रिहा गर्न बुधबार सर्वोच्च अदालतले आदेश दिएको थियो।
त्यही आदेशअनुसार उनलाई बिहीबार रिहा प्रक्रिया अघि बढाइएको केन्द्रीय कारागारका जेल ईश्वरीप्रसाद पाण्डेले बताए।
'भक्तपुर र काठमाडौं जिल्ला अदालतमा रहेका अलग अलग मुद्दामा सजाय काटेको पत्र आइसकेको छ', उनले भने, 'दुवै अदालतबाट पत्र आएकाले उनको रिहाइका लागि अहिले कारागारभित्रकै अस्पतालमा स्वास्थ्य जाँच हुँदैछ। स्वास्थ्य जाँच सकेर सकेसम्म आजै उनलाई अध्यागमन विभागमा बुझाउने तयारी गरेका छौँ।'
केन्द्रीय कारागारबाट लाइभ
अमेरिकी नागरिकको हत्या प्रकरणमा १९ वर्ष लामो सजाय काटिसकेका शोभराजको उमेर ७७ वर्ष नाघिसकेकाले सर्वोच्च अदालतले उनको ७५ प्रतिशत सजाय माफी मिनाह हुने आदेश गरेको थियो।
सर्वोच्चको आदेशअनुसार बिहीबार नै दुवै अदालतबाट शोभराजले सजाय कटाइसकेको पत्र केन्द्रीय कारागारमा पठाएका थिए।
काठमाडौं अदातले युनुसमाथिको गोलीकाण्डमा सजाय भोगिसकेको पत्र पनि पठाइदिएपछि शोभराज रिहाइ हुन लागेका हुन्। तर उनलाई जेलबाट सिधै अध्यागमन विभागमा लगेर बुझाइँदैछ।
त्यहाँबाट उनलाई अध्यागमन विभागले उनलाई फ्रान्सतर्फ डिपोर्ट गर्ने छ।
अमेरिकी नागरिकको हत्यासँगै २०६७ माघ २२ गते भारतको लखनउबाट आएका जस्जीत सिंहले शोभराजलाई नै भेट्ने बहानामा युनुसमाथि गोली हानेको घटनामा पनि मुद्दा लागेको थियो।
उक्त गोलीकाण्डमा काठमाडौं जिल्ला अदालतले शोभराजलाई पनि ५ वर्षको जेल सजाय सुनाएको थियो।
केन्द्रीय कारागारमा थुनामा रहेका समयमा पटक पटक शोभराजलाई भेटेका सिंहले युनुसमाथि गोली हानेका थिए।
शोभराजलाई भेट्ने बहानामा कारागारभित्र प्रवेश गरी अन्सारीलाई गोली हानेको त्यसबेला खुलेको थियो। त्यही आधारमा शोभराजलाई काठमाडौं जिल्ला अदालतले ५ वर्ष जेल सजाय सुनाएको थियो।
सर्वोच्चले शोभराजलाई बुधबार १५ दिनभित्र प्रक्रिया पूरा गरेर रिहा गर्न आदेश बुधबार नै दिइसकेको छ।
प्रतिक्रिया