युनिकोड
चीनमा नेपाली महिला टोली पराजित चीनमा जारी बी एण्ड आर कप टी-ट्वान्टी क्रिकेट प्रतियोगिताको अन्तिम खेलमा नेपाली यू–१९ राष्ट्रिय महिला टोली मलेसियासँग पराजित भएको छ।
सांघाईमा शुक्रबार भएको खेलमा नेपाल मलेसियासँग ५ विकेटले पराजित भएको हो। नेपालले दिएको १ सय १५ रनको लक्ष्य मलेसियाले २० ओभरमा ५ विकेट गुमाएर पुरा गरेको थियो। मलेसियाकी मास एल्सा यास्मिनले अविजित रहदै ५८ रनको अर्धशतकीय इनिङ्स खेलिन्। नेपालकी लक्ष्मी साउद, कृतिका मरासिनी, कविता कुँवर र ईश्वरी बिष्टले १/१ विकेट लिइन्।
यस अघि पहिले ब्याटिङ गरेको नेपालले २० ओभरमा ४ विकेट गुमाएर १ सय १४ रन बनाएको थियो । नेपालकी राजमती ऐरीले ३७ रन जोड्दा कविता कुँवर र लक्ष्मी साउदले समान १९/१९ रन जोडिन्। डली भट्टले १६ रन बनाईन्। मलेसियाकी नुर अब्दुल समादले २ विकेट लिईन्। यो सँगै प्रतियोगितामा नेपालले चार खेलमा दुई जित र दुई हारको आत्मसात गरेको छ।
यसअघि प्रतियोगिताको पहिलो खेलमा नेपालले थाइल्याण्डसँग २९ रनको हार व्यहोरेको थियो। दोस्रो खेलमा नेपालले चीनलाई ८ विकेटले हराएको थियो। यस्तै बिहीबार नेपालले म्यानमारलाई ३५ रनले हराएको थियो।
प्रतिक्रिया