विश्वकपका लागि उत्कृष्ट १५ खेलाडी छान्न कठिन छ : रोहित पौडेल

नेपाली क्रिकेट टोलीका कप्तान रोहितकुमार पौडेलले राष्ट्रिय टोलीका लागि सम्भावना बोकेका धेरै खेलाडी रहेकाले ट्वान्टी–२० विश्वकपका लागि अन्तिम १५ खेलाडी छनोट गर्न चुनौतीपूर्ण हुने बताएका छन्। 

शनिबार त्रिवीमा वेस्ट इण्डिज ‘ए’ विरुद्ध कप्तानी इनिङ खेल्दै जित दिलाएपछि पत्रकार सम्मेलनमा रोहितले यस्तो धारणा राखेका हुन्। 

आयरल्याण्डसँगको खेलबाट नै सबै खेलाडीमा राम्रो क्षमता देखिएको र सबैमा रिप्लेसमेन्ट गर्नसक्ने क्षमता रहेको रोहितले उल्लेख गरे। त्यसैले ट्वान्टी–२० विश्वकपका लागि उत्कृष्ट १५ खेलाडी छान्न चुनौती हुने उनको विश्वास छ। 

क्षमतावान खेलाडी धेरै रहेको उल्लेख गर्दै समग्रमा सबैको प्रदर्शन राम्रो रहेको धारणा राख्दै उनले आउने दिनमा जसले राम्रो गर्नसक्छ त्यहाँबाट उत्कृष्ट १५ खेलाडी विश्वकपका लागि छनोट हुने विश्वास व्यक्त गरे।

आगामी १÷२ खेलमा नै विश्वकपका लागि सबैको भूमिका तय हुने पनि रोहितले बताएका छन्। उनले शतकीय इनिङ खेल्छु नै भन्ने योजनामा नरहेको पनि उल्लेख गर्दै आफूले बलमा ध्यान दिँदै सोहीअनुरूप ब्याटिङ गरेको बताए। 

कप्तान रोहितले प्रशिक्षक मोन्टी देसाईसँग एउटा खेलाडीले राम्रो गर्नसक्यो भने टोलीमा आत्मविश्वास बढ्छ भन्ने छलफल हुने गरेको बताए।

ओमानसँगको खेलबाट निराश थियौं। त्यहाँबाट अगाडि बढ्न आवश्यक थियो। त्यो खराब दिन सोचेको भए आजको प्रदर्शन सम्भव थिएन। सबैले आ आफ्नो जिम्मेवारीअनरूपमा गरेँ। त्रिवि २०० सयको रन चेज गर्न सकिन्छ भन्ने थियो, त्यही अनुरूप खेल्यौं। यो लक्ष्य पूरा भएपछि पनि सेलिब्रेट गर्छु भन्ने थियो। त्यसैले शतक हाने पनि सेलिब्रेट गरिन, त्यो पूरा हुन सकेन,’ उनले भने।

नेपाली टोलीका प्रशिक्षक मोन्टी देसाईले ओमान भ्रमण आशातित प्रदर्शन गर्न नसकिएको उल्लेख गर्दै त्यसको जिम्मेवारी आफूले लिने बताए। तर आज रोहितले राम्रो प्रदर्शन गरेको प्रशिक्षक मोन्टीले बताए।

प्रशिक्षक मोन्टीले वेस्ट इण्डिजसँगको यो खेलले नेपाली टोलीमा आत्मविश्वास बढाउने आशा व्यक्त गरे। वेस्ट इण्डिजका प्रशिक्षक फ्लोयड रेइफरले आजको खेलमा राम्रो गर्न नसके पनि आगामी खेलमा राम्रो गर्न आशा व्यक्त गरे।