युनिकोड
आइतबार कुराकाओविरुद्ध खेल्दै जर्मनी विश्वकप आभियान सुरु गर्दै छ। उसको एउटै लक्ष्य हुनेछ, विश्वकप इतिहासकै सबैभन्दा ठूलो ‘अपसेट’बाट बच्ने।
चारपटकको च्याम्पियन जर्मनीको नाम यसपालि खासै आइरहेको छैन। किनभने टोली पछिल्ला दुई संस्करण समूह चरणबाटै बाहिरिएको थियो। त्यसैले कुराकाओविरुद्ध जर्मनीलाई साइकोलोजिकल दबाब हुनेछ।
यद्यपि जर्मनी बलियो लयका साथ अमेरिका आइपुगेको छ। पछिल्ला ९ खेलमा जर्मनीले विपक्षीलाई हराएको छ। यसै वर्ष भएका चार मैत्रीपूर्ण खेलमा जर्मनीले स्विट्जरल्यान्ड, घाना, फिनल्यान्ड र सह–आयोजक अमेरिकालाई हरायो।
जर्मनीले कुराकाओपछि आइभरी कोस्ट र इक्वेडरसँग खेल्नेछ। यसपालि पनि जर्मनी समूह चरणबाटै बाहिरिने हो भने फुटबल सरोकारवालाहरुका लागि यो आश्चर्यको विषय हुनेछ।
किनभने यसपटक तेस्रो स्थानमा रहने टोलीसँग पनि उत्कृष्ट ‘थर्ड रनर्स–अप’का आधारणमा नकआउट चरणमा पुग्ने अवसर छ। कुराकाओसँग जर्मनीलाई जितबाहेक अन्य विकल्प छैन। बराबरीको नतिजाले पनि टोली आलोचनाको शिकार बन्नेछ।
उता समूह ‘ई’को प्रतिस्पर्धामा पहिलो विश्वकप अनुभव लिइरहेको कुराकाओ ऐतिहासिक नतिजाको लक्ष्यमा हुनेछ। कुराकाओ भने विना दबाब मैदानमा प्रस्तुत हुनेछ। गत नोभेम्बरमा कुराकाओले कन्काकाफ छनोट प्रतियोगिताअन्तर्गत पहिलो र दोस्रो चरण दुवैमा शीर्ष स्थानमा रहँदै पहिलो पटक विश्वकपमा स्थान बनाएको थियो।
डिक एड्भोकाटको नेतृत्वमा रहेको कुराकाओले यो यात्रामा एक खेल पनि हारेन। त्यसैले कुराकाओ जर्मनीसँग डराइहाल्नुपर्ने टोली होइन।
विश्वकपअघिको वार्म अप (मैत्रीपूर्ण) खेलमा कुराकाओले स्कटल्यान्डसँग ४–१ को हार व्यहोरेको थियो। तर, अन्तिम मैत्रीपूर्ण खेलमा टोलीले अरुबालाई ४–० ले हराएको पनि थियो। फिफा वरीयतामा ८२औं स्थानमा रहेको कुराकाओका लागि जर्मनीविरुद्ध एक अंक खोस्नु पनि जित्नुसरह नै हो।
जर्मनीका खेलाडीहरु सबै फिट छन्। तर, पछिल्लो समय भेट्रान गोलकिपर म्यानुअल नुयुरलाई भने काल्फ इन्जुरीले सताएको छ। यद्यपि ४० वर्षीय नोयर कुराकाओविरुद्ध पहिलो रोजाइमै खेल्ने सम्भावना छ।
जर्मनीलाई उपाधिको दाबेदारका रुपमा नहेरिएपछि योसुवा किमिच, जोनाथन ताह, लेरोई साने, जमाल मुसियाला र फ्लोरियन विर्ट्ज जस्ता स्टार खेलाडीले टोलीको स्क्वाड डेप्थ निकै बलियो छ।
च्याम्पियन्स लिग फाइनलमा गोल गरेका आर्सनलका फरवार्ड काइ ह्याभर्ट्जले जर्मनको अग्रपङ्क्ति सम्हाल्नेछन् । २७ वर्षीय ह्याभर्ट्जले राष्ट्रिय टोलीमा कुल २२ गोल गरेका छन्।
कुराकाओमा पनि इन्जुरीका कुनै पनि समस्या छैनन्। एस्टन भिल्लाका पूर्वमिडफिल्डर लियान्ड्रो बाकुनाले टोलीको कप्तानी जिम्मेवारी सम्हाल्दै छन्। ३४ वर्षीय लियान्ड्रोलाई उनका भाइ जुनिन्हो बाकुनाले मिडफिल्डमा साथ दिनेछन्।
समूहको अर्को खेलमा सोमबार बिहान ४ः४५ बजे इक्वेडर र आइभोरी कोष्टबीच खेल हुनेछ।
प्रतिक्रिया