हेटौँडामा बाघको आक्रमणबाट एक महिला घाइते भएकी छन्। हेटौँडा उपमहानगरपालिका–१८ हर्नामाडीस्थित मानेडाँडा बस्ने अन्दाजी ५६ वर्षकी मैती बयलकोटीलाई बाघले आक्रमण गरेर घाइते बनाएको हो।
अपरान्ह ४ बजे घाँस काट्न जाँदै गर्दा सुकौरा जाने बाटोमा बाघले बयलकोटीलाई आक्रमण गरेको थियो। उनको गाला, ओठ र ढाडमा चोट लागेको र थप उपचारको लागि हेटौंडा अस्पताल पठाइएको ठूलोदमार प्रहरी चौकीका ईन्चार्ज अर्जुन प्रसाद देवकोटाले जानकारी दिए।
मंगलबारदेखि हर्नामाडीको गुम्बाडाँडामा बाघको आतंक मच्चिएको छ। हिजो स्थानीय हरिमाया मोक्तानको २ वटा बाख्रा खाएको बाघले आज सोही स्थानकै राजु पहेंलीको एउटा बंगुर खाएको र अर्कोलाई घाइते बनाएको छ। आजै महिलालाई समेत घाइते बनाएको छ।
गाउँमा बाघले निरन्तर रुपमा पशुचौपाया मार्ने र मानिसलाई समेत आक्रमण गर्न थालेपछि स्थानीयबासी त्रसित छन्। अहिले वन कार्यालयबाट घटनाबारे थप बुझ्न त्यसतर्फ गएको प्रहरी इन्चार्ज देवकोटाले बताए।
Shares
प्रतिक्रिया