युनिकोड
सरकारले आर्थिक वर्ष २०८१/०८२ मा झण्डै ६५ अर्ब रुपैयाँबराबरको वैदेशिक लगानी प्रतिबद्धता पाएको छ।
उद्योग विभागका अनुसार ०८१ साउनदेखि ०८२ असारसम्म कुल ६४ अर्ब ९६ करोड ५१ लाख ४३ हजार ४ सय रुपैयाँबराबरको लगानी प्रतिबद्धता प्राप्त गरेको हो।
यस्तो प्रतिबद्धता अटोमेटिक र अप्रुभल रुटबाट प्राप्त भएको हो। यसअनुसार अटोमेटिक रुटबाट विदेशी लगानीकर्ताहरुले ४ अर्ब ६१ करोड २६ लाख ६७ हजार र अप्रुभल रुटबाट ६० अर्ब ३५ करोड २४ लाख ७६ हजार ४ सय रुपैयाँको लगानी प्रतिबद्धता गरेका छन्।
उक्त लगानी प्रतिबद्धताअनुसार भित्रिए नेपालमा १९ हजार ५ सय ३६ रोजगारी सिर्जना हुनेछ।
गत महिना असारमा मात्रै ४ अर्ब ३५ करोड ४७ लाख रुपैयाँबराबरको आएको छ। असारको प्रतिबद्धताअनुसार लगानी भित्रिँदा ३ हजार १११ रोजगारी सिर्जना हुने उद्योग विभागले जनाएको छ।
विभागका अनुसार प्रस्तावित प्रतिबद्धता ८२४ साना उद्योग, १० वटा मध्यम र ६ वटा ठूला उद्योग खोल्नका लागि आएको हो। यसअनुसार सबैभन्दा बढी लगानी प्रतिबद्धता सूचना प्रविधि क्षेत्रमा आएको छ। सूचना प्रविधिमा लगानीकर्ताहरुले ३८२ उद्योगका लागि गरेका छन्।
त्यसैगरी उत्पादनमा ५५ वटा, ऊर्जामा १, कृषिमा १२, पर्यटनमा ३०४, सेवा क्षेत्रमा ८४ र पूर्वाधारमा २ वटा उद्योगका लागि लगानी प्रतिबद्धता आएको विभागले जनाएको छ।
अघिल्लो वर्ष असारको तुलनामा गत वर्ष असारमा लगानी प्रतिबद्धता घटेको हो। अघिल्लो वर्ष १८ अर्बको प्रतिबद्धता आएकोमा गत वर्ष असारमा ४ अर्बको मात्र प्रतिबद्धता आएको हो।
त्यसैगरी अघिल्लो वर्ष २ हजार २२९ वटा व्यावसायिक भिसा सिफारिस गरेको विभागले गत वर्ष २ हजार २८५ वटा सिफारिस गरेको छ। यो भिसा विदेशी लगानीकर्ताका लागि सिफारिस गरिन्छ। उनीहरुको प्रतिनिधिका लागि गत वर्ष ४०८ वटा र उनीहरुको परिवारको लागि ९१५ वटा भिसा सिफारिस गरेको विभागले जनाएको छ।
गत वर्ष नेपालमा लगानी गरेबापत विदेशी लगानीकर्ताहरुले १ अर्ब ८४ करोड ३३ लाख ४३ हजार ४ सय ७० रुपैयाँ रोयल्टीबापत लगेका छन्। यसरी अमेरिकी डलरमा ९९ लाख ६८ हजार ४२३ नेपालबाट बाहिरिँदा ८७ करोड ३५ लाख १६ हजार ७ सय ४९ भारतीय रुपैयाँ र ६१ हजार ४३१ युरो बाहिरिएको विभागले जनाएको छ।
लाभांशमार्फत विदेशी लगानीकर्ताले गत वर्ष मात्रै ९ अर्ब ६१ करोड ७० लाख २ हजार ९७९ रुपैयाँ नेपालबाट लगेका छन्। अघिल्लो वर्ष नेपालबाट १० अर्ब १८ करोड ७६ लाख ३९ हजार ९५१ रुपैयाँ बाहिरिएको थियो।
प्रतिक्रिया