युनिकोड
सम्पत्ति शुद्धीकरणको कसुरमा पुर्पक्षका लागि थुनामा रहेका व्यवसायी दीपक भट्ट र सुलभ अग्रवालसँग अरु दुई कसुरमा धरौटी माग गर्ने आदेश भएको छ। बिमा सम्बन्धी कसुर र धितोपत्र सम्बन्धी कसुरमा जिल्ला अदालत काठमाडौँले दुवैजनासँग धरौटी माग गर्ने आदेश दिएको हो।
बिहीबार न्यायाधीश शिवप्रसाद आचार्यको इजलासले बिमा ऐन २०७९ अन्तरगतको कसुरमा सुलभ अग्रवालसँग २ करोड र दीपक भट्टसँग डेढ करोड धरौटी माग गरेको हो।
धितोपत्र सम्बन्धी ऐन २०६३ अन्तरगतको छुट्टै कसुरमा सुलभ अग्रवालसँग २ करोड ३० लाख धरौटी माग गरिएको छ भने दिपक भट्टसमेत जोडिएको अर्को कसुरमा पनि धरौटी मागकै आदेश भएको छ। उक्त ८१ जना संलग्न रहेको अभियोगमा अग्रवालसँग १ करोड ५० लाख र भट्टसँग एक करोड धरौटी माग गर्ने आदेश भएको जिल्ला अदालत काठमाडौँका सूचना अधिकारी शिव खतिवडाले जानकारी दिए।
उनीहरुलाई असार ३ गते सम्पत्ति शुद्धीकरणको कसुरमा विशेष अदालतका न्यायाधीश सुदर्शनदेव भट्ट, उमेश कोइराला र विदुर कोइरालाको इजलासले पुर्पक्षका लागि थुनामा पठाउने आदेश दिएको थियो।
अहिले दुवैजना कारागारमै छन्।
प्रतिक्रिया