कस्तो छ सस्पेन्स थ्रिलर फिल्म ‘खेल’को ट्रेलर?

सस्पेन्स थ्रिलर फिल्म ‘खेल’को ट्रेलर सार्वजनिक भएको छ। सार्वजनिक ट्रेलरमा मुख्य कलाकारहरू सुरक्षा पन्त, मोनिका थापा, हेना नगरकोटी, निकिता आचार्य, समापिका गौतम, मिथिला शर्मा, सरिता गिरी, र भोलाराज सापकोटाको अभिनय देख्न सकिन्छ।

यो ट्रेलरमा शिक्षकले विद्यार्थीहरूलाई काठमाडौंको इतिहास पढाउँदै गरेका छन् भने केही अन्धविश्वास, रोगको प्रकोप र कालो जादुका विषयहरू पनि छन्। पुराना कलाकृति र शिलालेखहरूको दृश्यहरू छन्। साथीहरूबीचको मित्रता र असमझदारी दुवै देखाइएको छ। उनीहरू लुडो र अन्य खेलहरू खेलिरहेका छन्।

अभिनेत्री सुरक्षा पन्तको अस्वाभाविक व्यवहार, हेना नगरकोटीको रहस्य सुल्झाउने प्रयास, र मोनिका थापा र समापिका गौतमको फरक गतिविधिले चलचित्रमा रहस्य र डरको आभास दिन्छ।

ट्रेलरमा एउटा खेलपछि उत्पन्न हुने समस्याको चर्चा गरिएको छ। ‘एउटा पौराणिक कथा, सदियौँदेखिको बन्धन, एउटा घातक खेल, मित्रताको बन्धन, ईर्ष्याद्वारा भ्रष्ट, अकाट्य भोग’ जस्ता वाक्यांशहरूले चलचित्रको रहस्यमय र डरलाग्दो वातावरणलाई थप बलियो बनाएका छन्। यसबाट थाहा हुन्छ कि यो चलचित्र साथीहरूको कथासँगै काठमाडौं उपत्यकाको उत्पत्ति र इतिहास पनि बताउँछ।

चलचित्रको कथा नेपाली लोककथा, परम्परा, अध्यात्म, थ्रिलर, र सस्पेन्सको मिश्रणमा आधारित छ, जसमा अध्ययनका लागि काठमाडौँको होस्टेलमा बसेका साथीहरूको कथा प्रस्तुत गरिएको छ, जसलाई आफ्नै विगतको भयानक घटनाले पछ्याइरहेको हुन्छ। ट्रेलरमा यी साथीहरूको जीवनमा आउने रहस्यमय घटनाहरू र तिनले सामना गर्नुपर्ने चुनौतीहरूलाई देखाइएको छ।
 
अनुराग प्रधान र आस्था श्रेष्ठले संयुक्त निर्देशन रहेको यो फिल्म आगामी वैशाख १२ गते प्रदर्शन हुनेछ। सिरुपाते कट्स प्रालिको ब्यानरमा निर्माण गरिएको फिल्मका  निर्माताहरू लुइसराज महर्जन र आशिषराज महर्जन हुन्। चलचित्रको कथा आशिषराज महर्जनले लेखेका हुन् भने पटकथा अभितेन्द्र र अनुराग प्रधानले तयार पारेका छन्।