युनिकोड
नेपालको इतिहासमा भीमसेन थापा एउटा यस्तो नाम हो, जसले देशको राजनीतिक, सामाजिक, र सैनिक परिवर्तनमा महत्त्वपूर्ण भूमिका खेलेका छन्।
युगकवि सिद्धिचरण श्रेष्ठले रचना गरेको खण्डकाव्य‘भीमसेन थापा’ मा आधारित नाटक अब रंगमञ्चमा मञ्चन हुने भएको छ। निर्देशक सनम कुमार वैरागको परिकल्पनामा तयार भएको यो नाटक बेलायत र त्यसपछि नेपालका विभिन्न सहरमा मञ्चन हुने भएको हो।
भीमसेन थापा नेपालको पहिलो प्रधानमन्त्री थिए, जसले राष्ट्रको संरक्षण र स्वाधीनताका लागि अनगिन्ती संघर्ष गरे। उनको जीवन राजनीतिक उतारचढाव, युद्ध र व्यक्तिगत संघर्षले भरिएको थियो।
भीमसेन थापाको योगदानलाई साहित्यिक रूपमा उजागर गर्ने प्रयास युगकवि सिद्धिचरण श्रेष्ठले आफ्नो खण्डकाव्य भीमसेन थापामार्फत गरेका थिए। अब यो साहित्यिक कृति मञ्चमा जीवन्त हुन लागेको हो।
नाटकको निर्देशन अनुभवी निर्देशक सनम कुमार वैरागले गरेका छन्, जसले भीमसेन थापाको भूमिकामा आफैलाई प्रस्तुत गर्नेछन्। सहनिर्माता दिल घले हुन्।
करिब चार दशकअगाडि नेपालमा रंगमञ्चमा सक्रिय रहेका निर्देशक वैराग पछिल्लो समय लन्डनमा बस्छन्। उनले पछिल्लो समय फिल्म‘कैदीको पत्र’निर्देशन गरी नेपालमा समेत रिलिज गरेका थिए।
यसअघि उनले सन् २०१६ देखि बेलायतमै नाटकहरू ‘समय दृश्य’र ‘जिगिशा’ मञ्चन गरिसकेका छन्। यो नाटक पनि यसअघि बेलायतमा मञ्चन भई सफल रहेको र पुनः मञ्चन हुन लागेको निर्देशक वैरागले जानकारी दिए।
नाटकलाई अझ प्रभावशाली बनाउन गीत संगीतलाई विशेष स्थान दिइएको छ। चर्चित संगीतकार तारा प्रकाश लिम्बुले संगीत भरेका छन् भने गायनमा सपन कुमार राईको आवाज गुन्जिनेछ।
गीतका शब्द सनम कुमार वैरागले लेखेका छन्। नृत्यको संयोजन पनि यस नाटकको अर्को महत्त्वपूर्ण पक्ष हो। कोरियोग्राफर चरण प्रधानले ऐतिहासिक समयको चित्रण गर्ने शैलीमा नृत्यको निर्देशन गरेका छन्। नाटकको मञ्चन बेलायत र नेपाल दुवै ठाउँमा गरिनेछ।
बेलायतमा अप्रिल २६ देखि मे महिनाभर लन्डन, रिडिङ, विलबिच, अल्डरसट, स्कटल्यान्ड लगायतका विभिन्न सहरहरूमा मञ्चन हुनेछ। नेपालमा भने काठमाडौँको मण्डला थिएटरमा लगातार १५ शो प्रदर्शन हुनेछ, जुन आगामी दसैँ, तिहारपछि सुरु हुनेछ।
काठमाडौँको प्रदर्शनपछि पोखरा, चितवन, बिर्तामोड, धरान लगायतका सहरहरूमा नाटक मञ्चन गरिनेछ। यस नाटकमा अनुभवी कलाकारहरूको टोली छ। जसमा भीमसेन थापाको भूमिका सनम कुमार वैराग आफैँले निर्वाह गरेका छन् भने अन्य कलाकारमा सामन्ता तामाङ, सुरेश श्रेष्ठ, गोपाल बस्नेत र सुशन गुरुङ छन्।
भीमसेन थापा ऐतिहासिक व्यक्तित्व मात्र होइनन्, उनी नेपालका राष्ट्रिय पहिचानसँग जोडिएको नाम हो।
उनको योगदानलाई पुस्तौँ पुस्तासम्म पुर्याउने उद्देश्यले तयार पारिएको यो नाटक नेपाली रंगमञ्चका लागि महत्त्वपूर्ण हुनेछ।
प्रतिक्रिया