समीरको जन्मदिनमा ‘बलिदान’को प्रि-टिजर सार्वजनिक (भिडिओ)

अभिनेता समीर भट्टको जन्मदिनको अवसरमा ‘बलिदान’को प्रि(टिजर सार्वजनिक गरिएको छ। जन्मदिनको अवसर पारेर शुभकामना स्वरूप सार्वजनिक गरिएको टिजरमा समीर मात्रै फिचर्ड छन्।
 
टिजरमा अभिनेता भट्टका दमदार एक्सन दृश्यहरू देख्न सकिन्छ। जहाँ देशभक्तिपूर्ण भावनाले भरिएको न्यारेशनबाट टिजर सुरु हुन्छ। न्यारेशनमा भनिएको छ, ‘बलिदान’ देशको चिन्ता। माटोले खोज्दै छ जसलाई, जन्माइन आमाले उसलाई। रगत उम्लियो जसको। आमाको पिर, यो देशको शिर, कहिल्यै झुक्न नदिने सपुत हुँ म।’ 

भिडिओको अन्त्यमा समीरको आक्रोशपूर्ण चिच्याहटले दृश्यलाई अझ शसक्त बनाएको छ। यो फिल्म आगामी दसैंको फूलपातीमा रिलिज हुनेछ।
 
फिल्म निर्देशक सन्तोष सेनका अनुसार समीरमा कलाकारिता र अभिनयका सबै गुण भरिएका छन्, र ‘बलिदान’ले ती सबै पक्ष उजागर गरेको छ। सेनले प्रिटिजरलाई समीरको प्रस्तुतिको झलक भन्दै यो सिरिजमा थप झिल्काहरू क्रमशः सार्वजनिक गरिने बताए।

यस फिल्ममा समीरसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायतको अभिनय छ। फिल्ममा निर्माता पवन ब्राडफोर्ड बिस्ट हुन् भने प्रेम पुरी कार्यकारी निर्माता हुन्।