पोखरेलको ‘अन्त्यारम्भ’ कथासङ्ग्रह प्रकाशित

साहित्यकार डा. टीकाराम पोखरेलको ‘अन्त्यारम्भ’ नामक कथासङ्ग्रह प्रकाशित भएको छ।

कथामा प्रेम, यौन, जीवन, मानव मनोविज्ञान, मानवीय मूल्यमान्यवता, मानवताको ह्रास, राजनीतिक विक्रृति, विसङ्गति, समाजिक झिनाझम्टी, अपराध, अशिक्षा, अन्धविश्वास, अविकास र गरिबीबाट उत्पन्न विषम परिस्थितिहरुको उठान गरिएका छन्।

कल्पनाभन्दा बढी भोगाई, असामाजिक लाग्ने यथार्थ र समाजका कुरीतिप्रति व्यंग्यात्मक प्रहार गरिएका कथाहरुमा यौनका बाछिटा, केही प्रेमका मिठास, केही राजनीतिका धब्बा, केही छलनीतिका कुरा, केही कृत्य र केही कुकृत्य, केही लोभ र केही पापका पाटाहरू समाविष्ट छन्।

एक्काइस वटा कथाहरु समेटिएको कथा सङ्ग्रह सुन्दर स्वदेश प्रकाशनले प्रकाशित गरेको हो। पोखरलेको यो नवौँ कृति र दोस्रो कथा सङ्ग्रह हो। यसअगाडि पोखरेलको धोको (२०५६) प्रकाशित भएको थियो।

कथा, लघुकथा, निबन्ध, समालोचना र समसामयिक लेखनमा कलम चलाउँदै आएका पोखरेल राष्ट्रिय मानवअधिकार आयोगका प्रवक्ता समेत हुन्।