युनिकोड
टीकापुर साहित्य महोत्सवको तेस्रो संस्करण आउँदो चैत १३ देखि १५ गतेसम्म आयोजना हुने भएको छ। स्थापनाकालदेखि नै ‘साहित्यमार्फत सामाजिक सद्भाव’को नारा बोकेको टीकापुर साहित्य समाजले पत्रकार सम्मेलनमार्फत त्रिदिवसीय महोत्सवको मिति र समयतालिका सार्वजनिक गरेको हो।
महोत्सवको तेस्रो संस्करण ‘थारू साहित्य तथा सांस्कृतिक उत्सव’ विशेष हुनेछ। जम्मा २१ बहस सत्रहरू रहने महोत्सवमा प्रत्येक दिन सात बहस सत्रहरू हुनेछन्।
महोत्सव भाषाविद् तथा नेपाली र अन्य ६० भाषाका वर्णमालाका निर्माता माधवप्रसाद पोखरेलको ‘हाम्रो जाति, भाषा र संस्कृति’ शीर्षकमा विद्वत प्रवचनबाट आरम्भ हुनेछ।
नेपालमा विशेषगरी कैलाली, कञ्चनपुर, बाँके, बर्दिया र दाङ्देउखुरीमा थारू समुदायको बाहुल्य छ। ‘थारू भाषा, थारू लोक साहित्य तथा संस्कृति नेपालको विशिष्ट मौलिक सांस्कृतिक परम्परा र पहिचान भएकोले महोत्सवले यसको संरक्षण, संवर्द्धन र प्रवर्द्धन गर्ने उद्देश्य लिएको टीकापुर साहित्य महोत्सवका संस्थापक संयोजक साहित्यकार महेशविक्रम शाहले सुनाए।
‘हाम्रा रैथाने भाषा र मौलिक संस्कृतिलाई समुदायको पहिचान र गौरवका रुपमा विकास गर्दै भावी पुस्ताका लागि जोगाएर राख्न र यसको गरिमा र महत्त्वलाई नयाँ पुस्तासम्म पुस्तान्तरण गर्न साहित्य तथा सांस्कृतिक महोत्सवहरू महत्त्वपूर्ण माध्यम हुन्,’ संयोजक शाहले भने।
यसबाहेक महोत्सवमा भाषा, साहित्य, कला, संस्कृति, शिक्षा, समाज, राजनीति र विकासलगायतका क्षेत्रमा क्रियाशिल अध्येता, विज्ञ, अभियन्ता, शोधार्थी र आम नागरिकबीच छलफल हुनेछ।
महोत्सवको महत्त्वपूर्ण कार्यक्रमका रुपमा सुदूरपश्चिम प्रदेशका सर्जकहरूका लागि सुदूरपश्चिम कविता महोत्सव रहनेछ। कविता महोत्सवमा प्रथम हुने कवितालाई १५ हजार, द्वितीयलाई १० हजार र तृतीयलाई ५ हजार नगद पुरस्कार र प्रमाणपत्र दिइनेछ। सान्त्वनास्वरूप दुई जनालाई प्रमाणपत्र प्रदान गरिनेछ। महोत्सवमा सहभागी उत्कृष्ट कविताको सङ्ग्रह पनि प्रकाशन गरिने आयोजकले जनाएको छ।
सुदूरपश्चिम प्रज्ञा-प्रतिष्ठानसँग सहकार्य गरिएको तेस्रो संस्करणको मुख्य प्रवर्धक सुदूरपश्चिम प्रदेश सरकार रहेको छ भने टीकापुर नगरपालिका र जानकी गाउँपालिका यस महोत्सवका प्रवर्द्धक रहेका छन्। नेपाल पर्यटन बोर्ड यस महोत्सवको सहप्रवर्द्धक रहनेछ। महोत्सवलाई हालसम्म कृषि विकास बैंक, लक्ष्मी सनराइज बैंक र एभरेस्ट बैंकले प्रायोजन गरेका छन्।
अतिथि आगमनको दिन सहभागीलाई महोत्सवको नारा ‘उडेर, गुडेर, तैरिएर टीकापुर’ लाई सार्थकता दिन र टीकापुर भेकको पर्यटन प्रवर्द्धन गर्न कर्णाली नदीमा जलविहार गराइनेछ। त्यहीँ साँझ थारू संस्कृतिको प्रवर्द्धनका लागि ‘थारू सांस्कृतिक साँझ’ आयोजन गरिनेछ। महोत्सव अवधिभर पुस्तक प्रदर्शनीसमेत हुनेछ।
प्रतिक्रिया