युनिकोड
चलचित्र ‘बाः एक योद्धा’लाई कुवेर सिने डिस्ट्रिब्युसनले वितरण गर्ने भएको छ। निर्माता वसन्त लम्साल र कुवेर सिने डिस्ट्रिब्युसनबीच हालै सिनेमाको वितरणलाई लिएर कागजी सम्झौता भएको हो।
चलचित्र ‘बाः एक योद्धा’ र सिने डिस्ट्रिब्युसनका सञ्चालकद्वय आशिष एच तामाङ र प्रदीप धामीबीच सम्झौता भयो। हरि लम्सालको लेखन तथा निर्देशन रहेको यो चलचित्र भदौ १९ गतेबाट प्रदर्शनमा आउँदैछ। ‘बाः एक योद्धा’ कुशे औंसी अर्थात् बुबाको मुख हेर्ने दिनको पूर्वसन्ध्यामा प्रदर्शनमा आउन लागेको हो।
नेपाली संगीत क्षेत्रमा दर्जनौँ कालजयी गीत दिएका संगीतकार लम्साल रचनाकार र गायक पनि हुन्। फिचर फिल्ममा भने ‘बाः एक योद्धा’ उनको पहिलो निर्देशन हो। आर्टिस्टिक इन्टरटेनमेन्टको ब्यानरमा बनेको यो चलचित्रको कथासँगै पटकथा पनि लम्साल आफैँले लेखेका हुन्।
चलचित्र ‘बाः एक योद्धा’का निर्माता वसन्त लम्साल हुन्। गायक तथा सर्जकसमेत रहेका लम्सालले यसअघि अभिनेता विपीन कार्कीलाई लिएर चलचित्र ‘कर्मा’ निर्माण गरेका थिए।
चलचित्रमा अभिनेत्री झरना थापा, सुहाना थापा, अभिनेता दिव्यदेव पन्तलगायत कलाकार मुख्य भूमिकामा छन्। नेपाली समाजमा परिवारमा सन्तानको भविष्यका लागि बुबाले गर्ने त्याग, संघर्ष र जीवनभर झेल्ने चुनौतीहरूको कथा यसको मुख्य कथा भएको निर्माण टिमले जनाएको छ।
शिवराम श्रेष्ठको छायाकंन रहेको चलचित्रको मुख्य सहायक निर्देशक तारानाथ न्यौपाने हुन्।
प्रतिक्रिया