भिजिट भिषा लिएर कम्बोडिया, अवैध काममा प्रयोग हुँदा विचल्ली

छिटो र धेरै पैसा कमाइ हुने प्रलोभनमा परेर कम्बोडिया पुग्ने र विभिन्न अपराधिक काम गर्न बाध्य हुने नेपालीहरूको तथ्याङ्क प्रत्येक वर्ष बढिरहेको देखिएको छ । थाईल्यान्डको वैंककस्थित नेपाली दूतावासले दिएको पछिल्लो पाँच वर्षको तथ्याङ्क हेर्दा यो आँकडा प्रत्येक वर्ष दोब्बर बढिरहेको देखिन्छ । नेपालीहरू भिजिट भिषाको नाममा त्यहाँ पुग्ने र अवैध रुपमा सञ्चालित विभिन्न गैरकानुनी काममा प्रयोग हुने गरेका छन् । 

कम्बोडियाको प्रर्यटनसम्बन्धि तथ्याङ्क उल्लेख गर्दै दूतावासले जानकारी गराए  अनुसार सन् २०२१ मा १०१ जना नेपालीहरु भ्रमण भिसामा कम्बोडिया पुगेका थिए । त्यसपछि सन् २०२२ मा एक हजार ९७७ जना, सन् २०२३ मा दुई हजार ९४० जना, सन् २०२४ मा छ हजार ४०४ जना र सन् २०२५ मा नौ हजार ६७६ जना नेपालीहरु कम्बोडिया गएको देखिन्छ। 

यसरी गएका अधिकांश नेपालीहरू त्यहाँ अवैध रूपमा सञ्चालित अनलाईन ठगी, क्यासिनो तथा अन्य विभिन्न गैरकानुनी काममा प्रयोग हुने गरेका छन्। कतिपयलाई भने एक ठाउँबाट अर्को ठाउँमा स्थानान्तरण गर्दा पासपोर्ट हरायो भनेर स्वदेश फर्कन नदिइ अवैध काम गर्न बाध्य पार्ने गरिएको बताइन्छ।  

दूतावासका अनुसार कम्बोडियासहित त्यस क्षेत्रका अन्य देशहरू लाओस र म्यानमारमा पनि नेपालीहरू यसरी पुग्ने गरेका छन् । ती देशमा पुगेपछि नेपालीहरूको पासपोर्ट खोसिने र अवैध काममा लाग्न बाध्य पारिने गरिएको छ । दूतावासले लोभमा परी ती देशहरूमा पुगेर विचल्लि परेकाहरूको उद्धार गर्दै आएको छ।