युनिकोड
अमेरिकाका राष्ट्रपति डोनाल्ड ट्रम्पले युक्रेनका राष्ट्रपति भोलोदिमर जेलेन्स्की र इजरायलका प्रधानमन्त्री बेन्जामिन नेतन्याहुसँग मंगलबार ह्वाइट हाउसमा छुट्टाछुट्टै उच्चस्तरीय वार्ता गर्ने कार्यक्रम तय भएको छ।
युक्रेन युद्ध, इरानसँगको तनाव तथा पश्चिम एसियाको सुरक्षा अवस्था यी भेटवार्ताका मुख्य एजेन्डा रहने अपेक्षा गरिएको छ।
ह्वाइट हाउसका एक अधिकारीका अनुसार ट्रम्प-जेलेन्स्की भेटवार्ता मुख्य रूपमा रुस-युक्रेनबिच जारी शान्ति प्रक्रियामा केन्द्रित हुनेछ।
अधिकारीले अब युद्ध अन्त्य गर्ने समय आएको धारणा राखेका छन्।
उता ट्रम्प र नेतन्याहुबिचको वार्तामा इरानसँगको द्वन्द्व, इजरायल-लेबनान वार्ताको प्रगति तथा अब्राहम सम्झौता विस्तारका विषय प्राथमिकतामा रहनेछन्।
सोमबार पत्रकारहरूसँग कुरा गर्दै ट्रम्पले इरानका केही विषयमा नेतन्याहुसँग सामान्य मतभेद भए पनि दुवै देशबिचको गठबन्धन अत्यन्त निकट रहेको बताएका छन्।
नेतन्याहुले सोमबार वासिङ्टन प्रस्थान गर्नुअघि इरानबाट उत्पन्न सुरक्षा चुनौती नै आफ्नो भ्रमणको प्रमुख विषय हुने बताउँदै इजरायलको सुरक्षा सुदृढ गर्नु र क्षेत्रीय शान्तिको दायरा विस्तार गर्नु भ्रमणको उद्देश्य रहेको जानकारी दिएका थिए।
यो भेट ट्रम्प दोस्रो कार्यकाल सम्हालेपछि उनी र नेतन्याहुबिच हुने आठौँ आमनेसामने द्विपक्षीय बैठक हो र यो भेटले वासिङ्टन र जेरुसेलमबिचको घनिष्ठ समन्वयलाई थप पुष्टि गर्ने अपेक्षा गरिएको छ।
एयर फोर्स वनमा सञ्चारकर्मीसँग कुरा गर्दै ट्रम्पले अमेरिकाले इरानको सैन्य क्षमता कमजोर बनाएको दाबी दोहोर्याउँदै रुसबाट सहयोग प्राप्त भए पनि त्यसले तेहरानलाई निर्णायक लाभ नदिएको जिकिर गरेका छन्।
उनले जेलेन्स्कीको आरोप सत्य भए/नभएको विषयमा आवश्यक जानकारी संकलन गरिने पनि बताएका छन्।
ह्वाइट हाउसको भेटवार्तापछि ट्रम्प, जेलेन्स्की र नेतान्याहु वासिङ्टनमा आयोजित अमेरिकी सिनेटर स्वर्गीय लिन्डसे ग्राहमको अन्त्येष्टि कार्यक्रममा पनि सहभागी हुने बताइएको छ।
प्रतिक्रिया