जाजरकोट केन्द्रबिन्दु भएर गएराति गएको भूकम्पमा परी घाइते भएकाहरूको उपचारका लागि बाँकेको नेपालगन्जमा रहेका भेरी अस्पताल र कोहलपुर मेडिकल केजललाई तयारी अवस्थामा राखिएको छ।
गम्भीर घाइतेका लागि आवश्यक बेड र चिकित्सक तयारी अवस्थामा राखिएको ती अस्पतालले जनाएका छन्।
बाँकेका प्रमुख जिल्ला अधिकारी, अस्पताल प्रमुख, अस्पताल विकास समितिका अध्यक्ष र चिकित्सक घाइतेको उपचार व्यवस्थापनका लागि बिहानैदेखि जुटेका छन्।
बाँकेका प्रमुख जिल्ला अधिकारी श्रवणकुमार पोखरेलले घाइतेका लागि भेरी अस्पताल, सैनिक अस्पताल र प्रहरी अस्पतालका १०५ वटा बेड तयारी अवस्थामा राखिएको जनाए।
कोहलपुर मेडिकल कलेजलाई पनि तयारी अवस्थामा राखिएको छ। जहाँ पर्याप्त संख्यामा डाक्टर, नर्सिङ स्टाफ र अन्य प्रबन्ध मिलाइएको अस्पतालले जनाएको छ।
हेलिकप्टरबाट आउने बिरामीको लागि राँझा विमानस्थल र नेपाली सेनाका हेलिप्याडमा २/२ वटा एम्बुलेन्स तैनाथ गरिएको जिल्ला प्रशासन कार्यालयले बाँकेले जनाएको छ।
पछिल्लो तथ्याङ्कअनुसार रुकुम पश्चिम र जाजरकोटमा भूकम्पबाट घर भत्किँदा १५४ जनाको मृत्यु भइसकेको छ भने डेढ सयभन्दा बढी घाइते भएका छन्।
Shares
प्रतिक्रिया