युनिकोड
विराटनगरस्थित तुलसी बहुउद्देश्यीय सहकारीका तीनजना सञ्चालक पुर्पक्षको लागि कारागार चलान भएका छन्।
ठगी मुद्दामा पक्राउ परेका सहकारीका प्रबन्धक मन्दिप खवा, उपाध्यक्ष अनिता गौतम र सचिव सविना न्यौपानेलाई मोरङ अदालतले पुर्पक्षको लागि थुनामा राख्न आदेश गरेको हो।
मोरङ अदालतका न्यायाधीश प्रकाश कोइरालाको इजालशले प्रतिवादीहरूलाई पुर्पक्षको लागि थुनामा राख्न आदेश दिएको सूचना अधिकारी हेमराज बुढाथोकीले जानकारी दिए।
जिल्ला सरकारी वकिलको कार्यालयले मंगबार पक्राउ परेका तीन जना र सहकारीका अध्यक्ष केदारनाथ शर्मासहित ८ जना सञ्चालकहरू विरुद्ध ठगी मुद्दा दायर गरेको थियो।
फरार सूचीमा प्रतिवादी बनाएर सहकारीका अध्यक्ष शर्मा, सञ्चालक समितिका सदस्यहरू बन्टी अधिकारी, आदित्यराज भट्टराई, निर्मला पोखरेल भट्टराई, छविलाल विश्वकर्मा, पक्राउ परेका तुलसी सहकारीका क्षेत्रीय प्रबन्धक मन्दिप खवास, उपाध्यक्ष अनिता गौतम र सचिव सविना न्यौपानेलाई ठगीमा मुद्दा दायर गरेको थियो।
पक्राउ परेको हकमा अदालतले आदेश गरेको हो।
सहकारीका अध्यक्ष शर्मासहित सञ्चालक र प्रबन्धकहरूले ६७ करोड ७६ लाख २१ हजार २६८ रुपैयाँ हिनामिना गरेको मोरङ प्रहरीको अनुसन्धानबाट खुलेको छ।
जसमध्ये मोरङ प्रहरीमा १ हजार ३ सय ७ जनाले दिएको उजुरीको आधारमा मात्र ५० करोड ८८ लाख ७८ हजार ७२८ रुपैयाँ ठगी गरेको देखिएको छ।
अध्यक्ष शर्माले १६ करोड ९७ लाख ४२ हजार ५४० रुपैयाँ सहकारीको स्रेस्तामा नै नचढाई हिनामिना गरेको अभियोग पत्रमा उल्लेख छ।
शर्माले ३३ वटा निजी कम्पनी र जग्गामा लगानी गरेको पाइएको छ।
मोरङ प्रहरीले गरेको अनुसन्धान र लेखा परीक्षण प्रतिवेदन अनुसार शर्माले सहकारीको करडौं रुपैयाँ दुरुपयोग गरी सहकारीको मूल्य मान्यता र सिद्धान्तलाई लत्त्याएर आफ्नो निजी कम्पनी र जग्गामा लगानी गरेको पाइएको हो।
उनीद्वारा सञ्चालित निजी खाद्यजन्य, मोटर, इलेक्ट्रिक, चिउरा मिल, जुत्तादेखि मिडिया कम्पनीमा पनि लगानी गरेको पाइएको छ। निजी उद्योग बाहेक जग्गामा पनि शर्माले लगानी गरेको पाइएको छ।
उदयपुर र झापा मात्र शर्मा नाममा ३६ हजार २ सय ८ दशवलप ८७ वर्ग मिटर अर्थात् ५ बिघा ६ कठ्ठा जग्गा रहेको छ। उनको जन्मस्थल उदयपुरमा १५ कित्ता र झापामा ३ कित्ता जग्गा शर्माको नाममा रहेको छ।
उनीहरूलाई सहकारी ऐन २०७४ को दफा १२२ को उपदफा (ख), (घ), (ङ), (च) र (ज) बमोजिम ६ वर्षदेखि ८ वर्षसम्म कैद सजाय र उपदफा (१) को देहाय (घ) तथा (५) बमोजिम बिगो ५० करोड ८८ लाख ७८ हजार ७२८ रुपैयाँ जाहेरवालाहरूलाई र बिगो १६ करोड ९७ लाख ४२ हजार ५४० रुपैयाँ तुलसी सहकारी संस्थालाई भराई बिगो बमोजिम जरिवाना तथा कैद सजाय माग दाबी लिएर अभियोग दर्ता गरेको जिल्ला सरकारी वकिलको कार्यालय मोरङका जिल्ला न्यायाधीवक्ता राम हरी शर्मा काफ्लेले जानकारी दिए।
सहकारीका सञ्चालकहरूले ३ हजार ६३ जना सर्वसाधारणको जम्मा गरेको एक अर्ब ४५ करोड ७५ लाख ४५ हजार ९९१ रुपैयाँ रकम हिनामिना गरेको आरोप छ।
तुलसीको चार वटा शाखा रहेको छ। विराटनगरमा केन्द्रीय कार्यालय सहकारीबाट सबैभन्दाबढी सदस्य रहेको छ।
विराटनगरमा १ हजार ९ सय ७८ जनाले ६० करोड ४१ लाख ८ हजार ८६२ रुपैयाँ निक्षेप गरेका छन्। उजुरी दिन आउने मोरङको मात्र हो।
झापा, सिराहा र गाई घाटको उजुरी दिन बाँकी रहेको छ।
प्रहरीको अनुसन्धानबाट सहकारी संस्थाको बिराटनगर स्थित केन्द्रीय कार्यालय मार्फत कारोबार गर्ने १३०७ जना वचतकर्ताहरूको जम्मा रु ५० करोड ८८ लाख ७८ हजार ७ सय २८ रूपैया ठगी गरेको देखिएको छ।
संस्थाका अध्यक्ष केदारनाथ शर्माका ३३ वटा निजी कम्पनीहरुमा विना धितो एवं बिना कुनै कागजात अध्यक्षको मौखिक आदेशको भरमा करोडौं रकम प्रवाह भएको देखिएको प्रहरीले जनाएको छ।
तुलसी बहुमुखी सहकारी संस्था लिका अध्यक्ष केदारनाथ शर्मा लगायतका ७ जना पदाधिकारीहरू उपाध्यक्ष अनिता गौतम, सचिव सविना न्यौपाने, सञ्चालक सदस्यहरु छविलाल विश्वकर्मा, निर्मला पोखरेल भट्टराई, बन्टी अधिकारी, आदित्यराज भट्टराई र संस्थाका क्षेत्रीय प्रबन्धक मन्दिप खवासका विरूद्धमा प्रहरीले मोरङ जिल्ला अदालतमा सहकारी संस्थाको रकम हिनामिना गरेको कसुरमा मुद्दा दर्ता गरेको थियो।
प्रतिवादीहरू मध्ये संस्थाको उपाध्यक्ष, सचिव र क्षेत्रीय प्रबन्धकलाई पक्राउ गरेको थियो भने संस्थाको अध्यक्ष शर्मा भने हालसम्म फरार रहेका छन्।
संस्थाको शेयर सदस्य हुँदा १५ प्रतिशत भन्दा बढी व्याज, बोनस लगायतका आकर्षक आर्थिक सुविधा पाउने आश्वासन र प्रलोभनमा परी जाहेरवालाहरूले आफ्नो तथा बालबच्चा सहित परिवारका अन्य सदस्यहरूको सुरक्षित भविष्यको आशामा बचतकर्ताहरूले ठूलो रकम बचत गरेको देखिएको छ।
प्रतिक्रिया