बिरामी भए ओली

भाइरल ज्वरोका कारण नेकपा एमालेका अध्यक्ष केपी शर्मा ओलीको स्वास्थ्यमा समस्या देखिएको छ। 

अध्यक्ष ओली भाइरल ज्वरोका कारण स्वास्थ्यमा समस्या आएपछि औषधि आएर आराम गरिरहेका छन्।

उनले फेसबुकमा लेखेका छन्, ‘भाइरल ज्वरोका कारण मेरो स्वास्थ्यमा केही समस्या आएको छ, अहिले म एन्टिबायोटिक औषधि खाएर निवासमै आराम गरिरहेको छु।’

आगामी वैशाख १० गते तनहुँ–१, चितवन–२ र बारा–२ मा हुन लागेको उपनिर्वाचनमा पार्टीका उम्मेदवारलाई विजयको शुभकामना दिँदै उनले आफू अस्वस्थ भएका कारण चुनावी सभामा सहभागी हुन नसकेको उल्लेख गरेका छन्। 

‘तनहुँ, चितवन र बारामा वैशाख १० गते हुने उपनिर्वाचनमा हाम्रा पार्टीका उम्मेदवारको चुनावी अभियानमा सहभागी हुने मेरो इच्छा थियो, तर, अहिले म ती कार्यक्रममा सहभागी हुन सकिरहेको छैन’, अध्यक्ष ओलीले भनेका छन्, ‘तनहुँ– १ मा सर्वेन्द्र खनाल, चितवन–२ मा राम न्यौपाने र बारा–२ मा पुरुषोत्तम पौडेललाई हामीले उम्मेदवार बनाएका छौँ, तपाईंहरूको प्रतिनिधित्वका लागि उहाँहरू योग्य उम्मेदवार हुनुहुन्छ, उहाँहरूलाई विजय गराउनुहुन तनहुँ–१, चितवन–२ र बारा–२ का आम मतदातासमक्ष म विनम्र आग्रह गर्दछु।’

यस क्रममा अध्यक्ष ओलीले आफू स्वस्थ भएपछि तीनैजना उम्मेदवारलाई भेट्ने बताएका छन्।

‘स्वास्थ्य अवस्था ठीक भएपछि उपयुक्त समयमा म तपाईंहरूलाई भेट्न आउने नै छु’, उनले भनेका छन्, ‘तीनै उम्मेदवारलाई विजयको हार्दिक शुभकामना व्यक्त गर्दछु।’