युनिकोड
वरिष्ठ पत्रकार कनकमणि दीक्षितले भदौ २४ को विध्वंसपछि नेपालको अन्तर्राष्ट्रिय छवि धुमिल भएको बताएका छन्।
पूर्वराष्ट्रपति विद्यादेवी भण्डारीको उपस्थितिमा काठमाडौंमा भएको अन्तर्क्रिया कार्यक्रममा दीक्षितले भदौ २३ र २४ गते जस्तो ठूलो विनाश र विध्वंस नेपालको इतिहासमा कहिल्यै नभएको बताए।
उनले भने, ‘यो आन्दोलनपछि नेपालको अन्तर्राष्ट्रिय छवि धुमिल भएको छ। नेपालमा अन्तर्राष्ट्रिय हस्तक्षेप हुँदा नेताहरूले राम्रोसँग काम गर्न सकेका थिएनन्। अब त झनै त्यो बढ्ने अवस्था छ। हामी यहाँबाट उठ्न नसक्ने अवस्था छौँ।’
उनले भदौ २३ गते गोली चलाउन आदेश दिने र २४ गतेको विध्वंस छानबिन हुनैपर्नेमा जोड दिए। अन्यथा नेपालको गुमेको छवि फर्कन गाह्रो हुने उनको भनाई छ।
‘भदौ २३ गतेको गोलीकाण्ड र २४ गतेको विध्वंशको छानबिन हुनुपर्छ । गोली चलाउन आदेश दिनेलाई छानबिन हुनुपर्छ’ उनले भने, ‘विध्वंशमा संलग्नलाई कारबाही हुन सकेमा नेपालको अन्तर्राष्ट्रिय छवि सुध्रिन्छ।’
जेनजीका नाममा नेपालमा पहिले लुटेर सार्वजनिक र निजी संरचनामा आगो लगाइएको उनले बताए।
उनले आउने दिनमा हेर्दा अन्तर्राष्ट्रिय रुपमा पनि नेपालको छवि बदनाम भएको दोहोर्याए।
उनले जेनजीका नाममा सरकार ढाल्ने र राज्य व्यवस्था ढाल्ने दुवै कोसिस भयो। सरकार पल्टिँदा नेपालको राज्य व्यवस्था केही ढलेको उनले बताए ।
‘लिच्छवी, मल्ल, शाह र राणाकालमा पनि नेपालमा यो किसिमको विध्वंश भएको थिएन’, उनले भने, ‘नेपालले विश्वलाई नै क्लाइमेट क्राइसिसमा नेतृ्त्व गर्नुपर्छ भनिरहेका थियौँ। तर हामी आफैं अब गम्भीर संकटमा परेका छौँ।’
प्रतिक्रिया