युनिकोड
काठमाडौँ उपत्यका बाहिर जाने यात्रुलाई आफूले भनेको गाडीमा टिकट काट्नका लागि अत्याउने १३ जनालाई प्रहरीले पक्राउ गरेको छ।
शुक्रबार प्रहरी प्रभाग नयाँ बसपार्क र प्रहरी वृत्त कालिमाटीबाट खटिएको प्रहरी टोलीले टिकट काउन्टरमा काम गर्ने १३ जनालाई नियन्त्रणमा लिएको जिल्ला प्रहरी परिसर, काठमाडौँले जनाएको छ।
नयाँ बसपार्कबाट १२ जना र अलंकीस्थित सडकखण्डबाट एक जनालाई नियन्त्रणमा लिइएको परिसरका प्रवक्ता पवनकुमार भट्टराईले जानकारी दिए।
काठमाडौँ उपत्यका बाहिर जाने यात्रुलाई टिकट काउन्टरमा काम गर्ने कर्मचारीले अत्याउने गरेका छन्। उनीहरूले आफ्नो गाडीमा टिकट काट्न भन्दै यात्रुको झोला तथा सामान तान्ने, दुःख दिने, अभद्र व्यवहार गर्दै आएका छन्।
यस सम्बन्धी प्रहरी परिसरमा सूचना आएपछि प्रहरी टोली खटिएको भट्टराईले बताए। उनीहरूलई नियन्त्रणमा लिएर थप अनुसन्धान भइरहेको उनले जानकारी दिए।
प्रतिक्रिया