युनिकोड
सहिद दशरथ चन्द स्वास्थ्य विज्ञान विश्वविद्यालय सञ्चालनमा अवरोध हुने गरी कुनै पनि गतिविधि नगर्न आग्रह गरिएको छ।
विश्वविद्यालय स्थापनार्थ नागरिक तहबाट गठित संघर्ष समितिले आज (शुक्रबार) कैलालीको धनगढीमा पत्रकार सम्मेलन गरी दशकौँदेखिको प्रयासपछि विश्वविद्यालय सञ्चालनको प्रक्रियामा रहेकाले त्यसमा अवरोध हुने कुरा स्वीकार्य नभएको उल्लेख गरिएको छ।
संघर्ष समितिका संयोजक लोकराज पाण्डेले डा. गोविन्द केसीले सुरु गरेको अनशनबारे गम्भीर ध्यानाकर्षण भएको उल्लेख गर्दै सुदूरपश्चिम र सिंगो देशको गौरवका रूपमा रहेको सो विश्वविद्यालय सञ्चालनमा कुनै अवरोध नगर्न आग्रह गरेका हुन्।
‘यो विश्वविद्यालय सुदूरपश्चिमका २७ लाख नागरिकको साझा पूर्वाधार हो। यसमा सरकार, नागरिक र सरोकार भएकाहरुको दशकौँदेखिको योजना, दबाब, संघर्ष र सपना जोडिएको छ,’ संयोजक पाण्डेले भने, ‘त्यो सपना पूरा हुने अवस्थामा रहेका बेला डा. केसी र अन्य कसैले कुनै पनि बहानामा अवरोध गर्नुहुँदैन।’
संयोजक पाण्डेले अनसनरत डा. केसीले विश्वविद्यालयसम्बन्धी विषयलाई पहिलो बुँदामा राखेर आन्दोलन गर्नु जायज नभएको भन्दै पदाधिकारी नियुक्तिमा कुनै असहमति भए कानुनी बाटो अपनाउन आग्रह गरे।
‘सरकारले करिब आठ अर्ब लगानी गरेर यसै वर्षदेखि चिकित्सा शिक्षासम्बन्धी कार्यक्रम सञ्चालन गर्ने भएको छ। त्यसबाट सुदूरपश्चिमवासी उत्साहित छौँ,’ उनले भने।
संघर्ष समितिले कसैले अनशन वा आन्दोलन गरेकै भरमा विश्वविद्यालयका बाँकी काममा अवरोध आउने अवस्था नआउनेतर्फ सचेत रहन सरकारको ध्यानाकर्षण गराएको छ।
कुनै कारणले विश्वविद्यालयका काम रोकिए राज्यको अर्बौं लगानी र नागरिकको भरोसा टुट्ने अवस्था आउने भन्दै सरकारलाई बाँकी काम द्रुत गतिमा अगाडि बढाउन आग्रहसमेत गरिएको छ।
डा. केसीले पाँच बुँदे माग राख्दै बिहीबारदेखि कैलालीको धनगढीस्थित कृष्ण मन्दिर धर्मशालामा अनिश्चितकालीन अनशन सुरु गरेका छन्। रासस
प्रतिक्रिया