प्रतियोगिता नै रद्द भएपछि बन्द प्रशिक्षणमा रहेको महिला फुटबल टोली फुकुवा

भारतमा हुने भनिएको चार राष्ट्र सम्मिलित फुटबल प्रतियोगिता नै रद्द भएपछि अखिल नेपाल फुटबल संघ (एन्फा) ले बन्द प्रशिक्षणमा रहेका नेपाली राष्ट्रिय महिला फुटबल टोलीलाई फुकुवा गरेको छ।

भारतमा हुने फोर नेसन्स कपका लागि बन्द प्रशिक्षणमा रहेका नेपाली राष्ट्रिय महिला टोलीलाई एन्फाले सोमबार राति रिलिज गरेको हो। प्रतियोगिता डिसेम्बर ९ देखि २१ सम्म हुने तालिका थियो।

तर कोरोना भाइरसको महामारीका कारण भारतले प्रतियोगिता रद्द गर्दा बन्द प्रशिक्षणमा रहेका खेलाडीलाई फुकुवा गरेको एन्फाले जनाएको छ। 

प्रतियोगितामा आयोजक भारतसहित नेपाल, थाइल्याण्ड र एक अरेबियन देश सहभागी हुने बताइएको थियो।