युनिकोड
लुम्बिनी प्रदेशलाई पराजित गर्दै सुदूरपश्चिम प्रदेशले प्रधानमन्त्री कप एक दिवसीय राष्ट्रिय क्रिकेट प्रतियोगितामा तेस्रो जित दर्ता गरेको छ।
सोमबार भएको खेलमा सुुदूरपश्चिमले लुम्बिनीलाई १२ रनले हराएको हो। तीन खेलमा जित र एक खेलमा हार भोगेको सुदूरपश्चिमले ६ अंकमा तेस्रो स्थानमा उक्लेको छ।
एक खेलमा जित, २ खेलमा हार र एक खेलमा अंक बाँडेको लुम्बिनी प्रदेश ३ अंकमा तालिकाको पाचौँ स्थानमा छ।
सुदूरपश्चिमले दिएको १ सय ६९ रनको लक्ष्य पछ्याएको लुम्बिनीले ४०.२ ओभरमा १ सय ५६ रन बनाउँदा अलआउट भयो।
लुम्बिनीका सन्तोष यादवले ६७ रन बनाउँदा खडक बोहोराको बलमा बोल्ड आउट हुन पुगे। ध्रुव सुनारले ३६ र रञ्जित खड्काले ११ रन बनाए। अन्य ब्याटरले दोहोरो अंकको स्कोर छुन सकेनन्।
शेर मल्ल र खडक बोहोराले समान ३ विकेट लिए। हेमन्त धामीले २ तथा नारायण जोशी र लोकेन्द्र चन्दले समान एक विकेट आफ्नो नाममा गरे।
त्यसअघि वीरगञ्जस्थित नारायणी क्रिकेट मैदानमा लुम्बिनीले टस जितेर फिल्डिङ रोजेपछि ब्याटिङ गरेको सुदूरपश्चिम ४५.४ ओभरमा १ सय ६८ रन बनाउँदा अलआउट भयो।
सुदूरपश्चिमका लागि दीपक बोहोराले ३०, हेमन्त धामीले २९ रन बनाए। किरण ठगुन्नाले २०, अविशेक पलले १७, प्रकाश पाण्डेले १४, खडक बोहोरा र सौर्या श्रेष्ठले समान १० रन थपे।
लुम्बिनीका सन्तोष यादव र अजय चौहानले समान ४ विकेट लिए। सन्देश थापाले एक विकेट लिए।
प्रतिक्रिया