‘परान’को ट्रेलरमा बाबुछोराको सम्बन्धको कथा

कार्तिक १४ गतेबाट प्रदर्शन हुने फिल्म  ‘परान’  को ट्रेलर सार्वजनिक भएको छ। 

सार्वजनिक ट्रेलरले नेपाली समाजको पारिवारिक कथा प्रस्तुत गरेको छ। विशेषतः जीवनको उत्तरार्धमा आफ्ना सन्तानको सामीप्यताको खोजी गरिरहेका एक बाबुको पीडाको संवेदनालाई देखाउन खोजिएको छ। 

बाबुआमाले बुढेसकालमा सन्तानको साथ चाहने र सन्तानले आफ्नै आकांक्षाहरुलाई रोज्दा उत्पन्न हुने परिस्थिति वरिपरि ट्रेलर घुमेको छ। जहाँ फिल्मको शीर्ष भूमिकामा निर शाहले अभिनय गरेका छन्। 

‘परान’ फिल्मलाई डेब्यु निर्देशक दीपकप्रसाद आचार्य (काकु) ले निर्देशन गरेका हुन्। आचार्यकै कथा रहेको यस फिल्मको पटकथा र संवाद यम थापाले तयार पारेका हुन् । देशकै प्रतिष्ठित व्यवसायिक घराना गोल्छा समूह र प्रिज्मा समूहको साझेदारीमा स्थापना भएको कम्पनी ‘बाइस्कोप सिनेमा प्रा.लि.’ ले फिल्म निर्माण गरेको हो।