गत वर्षको दसैंमा रिलिज भएको हिट फिल्म ‘१२ गाउँ’ ओटीटीमा स्ट्रिमिङ भएको छ। बक्स अफिसमा २२ करोड रुपैयाँभन्दा माथिको व्यापार गर्न सफल यो फिल्म नेपालकै ओटीटी प्लेटफर्म ‘सिनेमाघर’ मा रिलिज भएको छ।
लक्ष्मीपूजाको अवसर पार्दै रिलिज गरिएको यो चलचित्रलाई दर्शकले २९९ रुपैयाँमा विश्वभरबाट हेर्न सक्नेछन्। यस फिल्ममार्फत गुगल प्ले स्टोर, एप स्टोर, एन्ड्रोइड टिभी, अमेजन फायर टिभी, सामसुङ स्मार्ट टिभी, एलजी वेबओएस लगायतमा डाउनलोड गरी तथा क्रोमकास्ट गरेर पनि सहजै हेर्न सकिन्छ। साथै, वेब ब्राउजरमार्फत कम्प्युटरमा पनि '१२ गाउँ' हेर्न सकिने सुविधा प्रदान गरिएको छ।
अभिनेता बिराज भट्टको निर्देशनमा फिल्ममा बिराजसँगै समीर, न्यान्सी खड्का, मोडल सनिशा भट्टराई, दिया मास्के, अर्जुनजङ्ग शाही, कनिज कोइराला, नरेन खड्का, सोनु चन्द्रपाल र दक्षिण भारतीय स्टन्ट निर्देशक सिल्भा सहितका कलाकारको अभिनय देख्न सकिन्छ। चलचित्रको कथा स्वयं बिराज भट्टले लेखेका हुन् भने पटकथा र संवाद सन्तोष सरकार ले तयार पारेका हुन्। द्वन्द्व निर्देशन दक्षिण भारतीय ख्यातिप्राप्त निर्देशक सिल्भाले गरेका हुन्।
नेपालकै प्रमुख पर्व तिहारको माहौलमा दर्शकलाई मनोरञ्जन प्रदान गर्न गरिएको यो डिजिटल रिलिजले नेपाली फिल्म उद्योगलाई डिजिटल प्लेटफर्मतर्फ उन्मुख गराउने नयाँ कदमको रूपमा हेरिएको छ। 'सिनेमाघर'ले पछिल्ला वर्षहरूमा नेपाली चलचित्रहरूलाई विश्वव्यापी दर्शकमाझ पुर्याउँदै आएको छ, र '१२ गाउँ' को रिलिजले यस अभियानलाई थप बल प्रदान गर्ने अपेक्षा गरिएको छ।
सिनेमाघरमा चर्चित चलचित्रहरू 'पिताम्बर', 'होस्टेल ३', 'गाउँ आएको बाटो', 'फेरी रेशम फिलिली' लगायतका दर्जनौँ चलचित्रहरू स्ट्रिमिङ भइरहेका छन्।
Shares

प्रतिक्रिया