‘अक्षरा’को सुटिङ सुरु, यस्तो छ कलाकारको टोली

निर्देशक विनयराज पौडेलको डेब्यु निर्देशन रहेको फिल्म ‘अक्षरा’ को छायांकन सुरु भएको छ। निर्माण पक्षले सोमबारदेखि काठमाडौँबाट फिल्मको सुटिङ थालेको हो।

केही दिनअघि काठमाडौँको गुहेश्वरी मन्दिरमा स्क्रिप्ट पूजा (मुहूर्त) गरिएसँगै फिल्म निर्माण प्रक्रिया अघि बढेको हो। फिल्मको छायांकन तालिका (सेड्युल) एक महिनाको तय गरिएको छ।

निर्देशक पौडेलले सम्पूर्ण तयारी र गृहकार्यपछि मात्र सुटिङ सुरु गरिएको जानकारी दिए। उनले भने, ‘हामीले कथाको मागअनुसार पटकथा र संवादमा पर्याप्त मिहिनेत गरेका छौँ। कलाकारहरूलाई कार्यशाला (वर्कसपं) गराएर मात्र फ्लोरमा ल्याएका हौँ। फिल्मले दर्शकलाई निराश बनाउने छैन।’ 

यस फिल्ममा सुशील सिटौला, न्यान्सी खड्का, सुशील पोखरेल, पुष्कर राउत, रिस्ता अधिकारी, अंशु महर्जन, गीता अधिकारी, वीरेन्द्र कुशवाह र सृजना अधिकारीको मुख्य अभिनय रहनेछ। फिल्ममा बालकलाकारका रूपमा रोनक खड्का र प्रीसा ढुङ्गानाको पनि अभिनय रहनेछ।