युनिकोड
विश्व प्रतिष्ठित फिल्म महोत्सव कान्समा नेपाली फिल्म 'एलिफेन्ट्स इन द फग'ले महत्त्वपूर्ण पुरस्कार ‘जुरी प्राइज’ जितेको छ।
फ्रान्समा भएको ७९औँ कान्स फिल्म फेस्टिभलमा अविनाश विक्रम शाह निर्देशित फिल्म 'एलिफेन्ट्स इन द फग'ले दोस्रो महत्त्वपूर्ण विधा 'अन सर्टेन रिगार्ड'तर्फ क्लोजिङ सेरोमनीमा उक्त अवार्ड जितेको हो।
यस विधाको मुख्य अवार्ड ‘अन सर्टेन रिगार्ड प्राइज’ भने सान्ड्रा वुल्नरको फिल्म ‘एभ्रिटाइम’ले जितेको छ। त्यसपछिको दोस्रो मुख्य अवार्ड नेपालले पाएको हो।
कार्यक्रममा सहभागी काठमाडौँ महानगरपालिकाकी कार्यवाहक प्रमुख सुनिता डंगोलले खुसी हुँदै शुक्रबार राति सामाजिक सञ्जालमा लेखेकी छन्, ‘नेपालले भर्खरै ७९औँ कान्स फिल्म फेस्टिभलमा इतिहास रच्यो। अविनाश विक्रम शाह निर्देशित एलिफ्यान्ट्स इन द फगले कान्स २०२६ मा अन सर्टेन रिगार्डमा निर्णायक पुरस्कार जितेको छ। यो केवल एउटा फिल्मको जित मात्र होइन, यो नेपाली सिनेमाको लागि ऐतिहासिक क्षण हो।’
सुनिता डंगोलको फेसबुक पोस्ट
फ्रान्सको कान्सका मेयर डेभिड लिसनार्डको निम्तोमा काठमाडौँ महानगरपालिकाकी कार्यवाहक प्रमुख डंगोल कान्स फिल्म फेस्टिभलमा सहभागी हुन गत आइतबार फ्रान्स प्रस्थान गरेकी थिइन्। कान्स र काठमाडौँ दुवै युनेस्कोको ‘क्रिएटिभ सिटी’को चलचित्र विधाका सदस्य नगर हुन्।
यही जेठ ७ गते कान्स फिल्म फेस्टिभलमा नेपाली फिल्म ‘एलिफेन्ट्स इन द फग’ को वर्ल्ड प्रिमियर भएको थियो।
प्रिमियरअघि निर्देशक अविनाश विक्रम शाहसहित फिल्मका मुख्य कलाकारहरू पुष्प थिङ लामा, सहद दिन मिया, जस्मिन विश्वकर्मा, अलिज घिमिरे, चयन अधिकारीलगायत कान्सको रेड कार्पेटमा प्रस्तुत भएका थिए।
कान्समा फिल्मको प्रिमियर हेरेर विश्वका चर्चित चलचित्रकर्मीले ‘एलिफेन्ट्स इन द फग’को तारिफ गरेका थिए।
भारतका चर्चित निर्देशक अनुराग कश्यपले लेटरबक्सडी (फिल्महरूको मूल्यांकन र समीक्षा गर्ने प्लाटफर्म) मार्फत फिल्मको खुलेर प्रशंसा गरेका थिए।
कान्समा प्रिमियर भएपछि अन्तर्राष्ट्रिय मिडियामा समेत फिल्म ‘एलिफेन्ट्स इन द फग’को समीक्षा प्रकाशन भएको थियो। प्रतिष्ठित हलिउड म्यागजिन भेराइटीले एक ट्रान्सजेन्डर समुदायमा आधारित मन छुने फिल्म भनेर लेखेको छ।
निर्देशक अविनाश विक्रम शाहले दक्षिण एसियामा ट्रान्स पहिचानप्रतिको स्वीकृतिको लेनदेनमुखी स्वरूपलाई सूक्ष्म रूपमा प्रस्तुत गरेको समीक्षामा उल्लेख छ।
अविनाशको लेखन र निर्देशनमा बनेको फिल्म ‘एलिफेन्ट्स इन द फग’मा जंगली हात्तीको आतंकबाट आक्रान्त बस्तीमा बसोबास गर्ने अल्पसंख्यक समुदायको कथा छ।
यो फिल्मले २०८१ सालमा ६ लाख नर्वेजियन क्रोनर (झन्डै ७६ लाख रुपैयाँ) को ‘सरफन्ड ग्रान्ट’ जितेको थियो। फिल्ममा मुख्य अभिनेत्री पुष्पा थिङ छिन्। उनीहित दिपीका यादव, जस्मिन विश्वकर्मा, एलिज घिमिरे, जोएल गुरुङ, उमेश पाण्डेलगायतले अभियन गरेका छन्। गौरी मल्ल, माओत्से गुरुङ, शान्ति गिरी, संजय गुप्ता दुरा, महिमा नवबाग, आशान्त शर्मा, अनिल कुर्मी, आकांक्षा कार्कीलगायत पनि यस फिल्ममा छन्।
जयन्ती क्रिएसनबाट कुमुदिनी गुरुङ श्रेष्ठ, सोहम ढकाल, प्रचण्डमान श्रेष्ठ निर्माता छन्। अन्डरग्राउन्ड टकिज नेपालको तर्फबाट अनुप पौडेल निर्माता रहेको यस चलचित्रमा फ्रान्सबाट जस्टिन पेचबर्टी र डेमियन मेघेर्बी, जर्मनीबाट माइकल हेनरिक्स र पल जिश्लर, ब्राजिलबाट तातियाना लेइते तथा लेओनार्दो मेक्की र नर्वेबाट भेरोना मेइर स्टोर्म अन्तर्राष्ट्रिय निर्माता हुन्।
चलचित्रलाई चलचित्रकर्मी मिन भाम, चलचित्रकर्मी प्रवेश गुरुङ, अभिनेत्री केकी अधिकारि, प्रतीक सुवेदी, प्रतिभा जोशी, सन्तोष भट्टराई, आदित्य बस्ने र अनोज पौड्यालले निर्माताको रूपमा योगदान दिएका छन्।
प्रतिक्रिया