युनिकोड
चीनको ‘हिमालयन रिम फिल्म एक्जिबिसन’ले काठमाडौँमा दोस्रोपटक ‘हिमालय रिम चलचित्र प्रदर्शनी’ सम्पन्न गरेको छ।
कीर्तिपुरस्थित त्रिभुवन विश्वविद्यालअन्तर्गत आमसञ्चार तथा पत्रकारिता विभागमा बुधबार सुरु चिनियाँ चलचित्र प्रदर्शनी बिहीबार सम्पन्न गरिएको हो।
‘मार्सल आर्टद्वारा एकता, चलचित्रको उज्यालोद्वारा सम्बन्ध’ मूल नारासहित आयोजित ‘हिमालयन रिम फिल्म एक्जिबिसन’मा ‘ब्लेड्स अफ दी गार्जियनः वाइन्ड राइज इन दी डिजर्ट’, ‘दी लिजेन्ड अफ दी कन्डर हिरोः दी ग्यालेन्ट्स’, ‘दि मास्टर’ र ‘आई एम ह्वाट आई एम २’ प्रदर्शन गरियो।
यस प्रदर्शनीले चिनियाँ वुसिया (मार्सल आर्ट) चलचित्रको क्रियात्मक सौन्दर्यशास्त्र र वीरताको भावनालाई केन्द्रमा राख्दै आधुनिक इमेजिङ प्रविधि तथा डिजिटल सौन्दर्यशास्त्रमार्फत चीन र नेपालका चलचित्रकर्मी तथा युवा विद्यार्थीबिच अन्तरसांस्कृतिक संवादको सेतु निर्माण गरेको छ।
कार्यक्रममा चर्चित चलचित्रकर्मीहरू, चीन तथा नेपालका विभिन्न सांस्कृतिक विद्वान् तथा विश्वविद्यालयका अतिथिहरू सहभागी भई दर्शकहरूसँग पूर्वीय कथावाचनका नयाँ सम्भावनाहरूको खोजी गरेका थिए।
प्रदर्शनीअन्तर्गत नेपाल अन्तर्राष्ट्रिय चलचित्र महोत्सवसँगको सहकार्यमा ‘एआई फिल्म कार्यशाला’ आयोजना गरिएको थियो। चाइना मिडिया ग्रुपको फिल्म च्यानलको हाङ्झाउ आधारका एआईजीसी अनुसन्धानकर्ता पिटर प्यानले अतिथि प्रशिक्षकका रूपमा सहभागिता जनाउँदै एआईमार्फत तस्बिरलाई भिडियोमा रूपान्तरण गर्ने सम्पूर्ण सिर्जना प्रक्रियाबारे जानकारी गराए।
उनले अत्याधुनिक प्रविधिले दृश्य सौन्दर्यलाई कसरी पुनःपरिभाषित गरिरहेको छ भन्ने जानकारी दिए।
चीन, नेपाल र भारतका सांस्कृतिक तत्वहरूको संयोजनमा तयार गरिएको ऊर्जाशील एआई प्रचार भिडियोबाट सुरु भएको थियो। त्यसपछि केसन हे ले अनलाइनमार्फत सहभागी भई चाइना मुभी च्यानल हाङ्झाउ स्टुडियोको एआई चलचित्र परियोजना ‘लियाओ झाइ २०७९’ बारे जानकारी दिए।
उनले एआई ट्रेलरको प्राविधिक संरचना र सिर्जनात्मक अवधारणाबारे प्रकाश पार्दै कृत्रिम बुद्धिमत्ताले परम्परागत वुसिया कथालाई कसरी नयाँ जीवन प्रदान गर्न सक्ने बताए।
चीन र नेपालका चलचित्रविद्हरूले परम्परागत सौन्दर्यलाई समकालीन परिवेशमा कसरी अभिव्यक्त गर्न सकिन्छ तथा विश्वव्यापीकरणले यसको विकासका लागि कस्ता अवसरहरू सिर्जना गरेको छ भन्ने विषयमा छलफल भएको थियो। उनीहरूले विविध संस्कृतिका कथाहरूलाई विश्वसामु प्रस्तुत गर्ने नयाँ सम्भावनाहरू अनुभव आदान प्रदान गरे ।
चिनियाँ चलचित्र इतिहासकै सबैभन्दा बढी आम्दानी गर्ने वुसिया चलचित्र ‘ब्लेड्स अफ द गार्डियन्स: विन्ड राइजेस इन द डेजर्ट’ को प्रदर्शनले प्राध्यापक तथा विद्यार्थीहरूको ठूलो उपस्थिति आकर्षित गरेको थियो। डिजिटल दृश्य प्रभाव तथा एनिमेसन प्रविधिको प्रयोगमार्फत चलचित्रले पश्चिमी भूभाग हुँदै एउटा रहस्यमय बालकको सुरक्षा गर्ने मरुभूमि सुरक्षाकर्मीको जीवन/मरणको यात्रालाई सजीव रूपमा प्रस्तुत गरेको छ।
साथै चिनियाँ वुसिया परम्परामा रहेको ‘जुनसुकै मूल्य चुकाएर पनि वचन पालन गर्ने’ नैतिक आदर्श र सम्मानको सौन्दर्यशास्त्रलाई प्रभावशाली ढंगले चित्रण गरेको छ।
त्यसपछि आयोजित ‘निर्मातासँग संवाद’ कार्यक्रममा चलचित्रका निर्माता लिउ दीले मरुभूमिमा छायाङ्कन गरिएका लडाइँका दृश्यहरूमा मोसन क्याप्चर र भर्चुअल उत्पादन प्रविधिको नवीन प्रयोगबारे जानकारी दिए। उनले डिजिटल छविसम्बन्धी प्रविधिले स्थानीय कथावाचनका आयामहरूलाई कसरी विस्तार गरिरहेको छ भन्ने व्याख्या गर्दै प्रविधि र सौन्दर्यको संयोजनले सिर्जना गरेका असीम सम्भावनाहरू प्रस्तुत गरे ।
कलात्मक ढंगले डिजाइन गरिएका चलचित्र सामग्री तथा सांस्कृतिक सिर्जनात्मक उत्पादनहरू समेटिएको ‘वुसिया फेयर’ ले दर्शकलाई अन्तरक्रियात्मक सांस्कृतिक अनुभव प्रदान गर्दै पर्दाभित्रको वुसिया संसारलाई जीवन्त रूपमा दर्शकसामु ल्याएको थियो।
त्रिभुवन विश्वविद्यालयमा सम्पन्न पहिलो चरणले परिसरभर वुसिया संस्कृति र चलचित्र प्रविधिबारे उत्साहपूर्ण बहस सिर्जना गरेको थियो। प्रदर्शनपछि धेरै प्राध्यापक तथा विद्यार्थीहरूले आधुनिक इमेजिङ प्रविधिको प्रयोगमार्फत चिनियाँ वुसिया चलचित्रले सिर्जना गरेको दृश्य प्रभावबाट आफूहरू प्रभावित भएको प्रतिक्रिया दिएका थिए। उनीहरूका अनुसार परम्परागत सौन्दर्यशास्त्रको पुनर्निर्माण र पुनर्कल्पनाले स्थानीय कथावाचनका लागि पनि महत्त्वपूर्ण प्रेरणा प्रदान गरेको छ।
चीन र नेपालका चलचित्रकर्मीहरूले संवादमार्फत नयाँ विचारहरूको आदानप्रदान गरे। युवा विद्यार्थीहरूले चलचित्र प्रदर्शनबाट साझा अनुभूति प्राप्त गरे। यसले प्रविधि र कथावाचनमार्फत दुवै पक्षलाई अझ नजिक ल्याएको छ।
चिनियाँ कराते र मार्सल आर्ट्सलाई केन्द्रमा राखिएको चलचित्रबारे कलाकारहरूले चीनबाटै अनलाइनमार्फत नेपाली दर्शक/विद्यार्थीसमक्ष आफ्ना अनुभव तथा धारणा प्रस्तुत गरेका थिए।
उक्त प्रदर्शनी अब शनिबार र आइतबार पोखरामा सञ्चालन गरिने ‘हिमालयन रिम फिल्म एक्जिबिसन’ले जानकारी दिएको छ।
प्रतिक्रिया