किसानले दूधको भुक्तानी नपाएकोमा सांसदको चिन्ता

कोसी प्रदेश सभाका सांसदहरूले शून्य समयमा किसानको दूध भुक्तानी, सडक दुर्घटना र विकास योजनामा भुक्तानी ढिलाइबारे सरकारको ध्यानाकर्षण गराएका छन्।

तेह्रथुमका सांसद किशोरचन्द्र दुलालले विराटनगरस्थित दूग्ध वितरण केन्द्रमार्फत सङ्कलित दूधको भुक्तानी सात महिनादेखि किसानहरूले पाउन नसकेको बताएका छन्।

उनका अनुसार, तेह्रथुमको चित्रे दूध सङ्कलन तथा वितरण केन्द्रमार्फत मात्रै १ करोड ३५ लाख रुपैयाँ भुक्तानी बाँकी छ, भने विराटनगर दूग्ध वितरण केन्द्रले जम्मा १९ करोड रुपैयाँभन्दा बढी भुक्तानी गर्न बाँकी राखेको छ।

‘हिमाल–पहाडका किसानको दैनिकी कष्टकर छ, उत्पादनको प्रतिफल नपाउँदा व्यवसाय नै छाड्नुपर्ने अवस्था आएको छ,’ दुलालले भने।

उदयपुरका सांसद नारायणबहादुर बुर्जा मगरले उदयपुरगढी गाउँपालिका–७ को मदन भण्डारी राजमार्ग अन्तर्गत ‘अधेरी’ क्षेत्रमा दैनिक दुर्घटना हुने गरेको बताए। उनका अनुसार, घुमाउरो सडकका कारण सयौंको मृत्यु र हजारौं घाइते भएका छन्।

‘हालको सडक एलाइनमेन्ट नै परिवर्तन गर्नुपर्ने अवस्था आएको छ’, उनले भने, ‘केही दिनअघि गोठालो गएका एक व्यक्तिको समेत सवारी अनियन्त्रित भएर ज्यान गयो।’

इलामका सांसद शमशेर राईले आर्थिक वर्ष २०८०/८१ का लागि स्वीकृत कार्यक्रमको भ्याट विल काटेर पनि  ३ करोड ५० लाख भुक्तानी बाँकी रहनु सरकारको उदासीनता भएको बताए।

उनले विपद व्यवस्थापनका ७७ योजनामध्ये २१ वटा मात्र भुक्तानी भएको विषयमा सरकारको धारणा मागे।

त्यसैगरी सांसद मिना श्रेष्ठले जोगबनी–किमाथाङ सडक निर्माणमा भएको ढिलासुस्ती र एसियन हाइवेमा निर्माण गरिएको डाइभर्सनका समस्याबारे प्रश्न उठाइन्।