युनिकोड
कोसी प्रदेशका मुख्यमन्त्री हिक्मतकुमार कार्कीले प्रदेशको आर्थिक गतिविधिलाई चलायमान बनाउन निजी क्षेत्रलाई साथमा लिएर अगाडि बढ्ने प्रतिबद्धता जनाएका छन्।
नेपाल उद्योग वाणिज्य महासंघ कोसी प्रदेशको चौथो कार्यकारिणी समितिको पदस्थापन समारोहलाई सम्बोधन गर्दै मुख्यमन्त्री कार्कीले निजी क्षेत्रलाई डर र त्रासको वातावरणबाट मुक्त राख्ने बताए। व्यवसायीलाई सुरक्षाको प्रत्याभूति दिलाउँदै प्रदेशको समृद्धिका लागि सरकार र निजी क्षेत्रबीच सहकार्य आवश्यक रहेको उनले बताए।
आगामी वर्षको बजेटलाई उपलब्धिमूलक क्षेत्रमा केन्द्रित गर्न निर्देशन दिइसकेको जानकारी दिँदै उनले विकासलाई फराकिलो ढङ्गले बुझ्न आग्रह गरे। विकास भनेको बाटो र पुल मात्र नभएर सूचना प्रविधि र पर्यटन पनि भएको उल्लेख गर्दै ती क्षेत्रमा लगानी बढाउन निजी क्षेत्रलाई आह्वान गरे।
कार्यक्रममा विराटनगर महानगरका मेयर नागेश कोइरालाले महानगरले सदैव उद्योगी व्यवसायीको हितमा काम गर्ने प्रतिबद्धता जनाए। महासंघका नवनिर्वाचित अध्यक्ष राजेन्द्रबहादुर राउतले राजनीतिक स्थिरताले जलविद्युत्, पर्यटन, उद्योग र कृषिको विकासमा टेवा पुग्ने र यसले समग्र आर्थिक समृद्धि ल्याउने विश्वास व्यक्त गरे।
समारोहमा महासंघका उपाध्यक्ष दिपसुन्दर श्रेष्ठ, केन्द्रीय सदस्य सुयेश प्याकुरेल, पूर्वउपाध्यक्ष किशोर प्रधान, नरेन्द्र खड्का तथा नेपाल उद्योग परिसंघका प्रदेश अध्यक्ष पवन शारडा लगायतले निजी क्षेत्रको हकहितका लागि सरकार र महासंघबिच प्रभावकारी समन्वय हुनुपर्नेमा जोड दिए।
कार्यक्रममा अध्यक्ष राउतसहितका नवनिर्वाचित पदाधिकारीलाई शपथ ग्रहण गराई पदस्थापन गरिएको थियो।
प्रतिक्रिया