भारतमा कोरोना भाइरस (कोभिड-१९) बाट संक्रमित हुनेको संख्यामा कमी आउन थालेको छ। कोभिड-१९ बाट प्रभावित धेरै राज्य र शहरमा निषेधाज्ञा, लकडाउन र प्रतिबन्धहरु घोषणा गरिएसँगै संक्रमितको संख्या घट्न थालेको हो।
वल्र्डओमिटरका अनुसार पछिल्लो २४ घण्टामा भारतमा तीन लाख ४८ हजार पाँच सयमा संक्रमण पुष्टि भएको छ,। गत साता भारतमा दैनिक संक्रमितको संख्या साढे चार लाख नाघेको थियो। भारतमा हालसम्म कूल संक्रमितको संख्या दुई करोड ३३ लाख ४० हजार नाघेको छ।
कोभिड–१९ संक्रमणको कारण भारतमा पछिल्लो २४ घण्टामा चार हजार दुईसयले ज्यान गुमाएका छन्। मृत्युदरमा भने कमी आउन नसकेको भारतीय सञ्चार माध्यमहरुले जनाएका छन्। हाल भारतमा कोरोना भाइरसको संक्रमणबाट मृत्यु हुनेको संख्या दुई लाख ५४ हजार दुई सय २५ पुगेको छ। यो बुधबार बिहान सात बजेसम्मको तथ्यांक हो।
भारतमा हाल करिब साढे ३७ लाख व्यक्ति सक्रिय संक्रमित अवस्थामा छन् जुन अघिल्लो दिनभन्दा ३० हजारले कमी हो । हालसम्म एक करोड ९० लाख २७ हजार व्यक्ति कोरोनाभाइरसबाट समुक्त भएका छन्।
कोरोनाभाइरसको दोस्रो लहरका कारण ठूलो मानवीय क्षति भइरहे पनि भारत सरकारले देशव्यापी लकडाउन नगरिने स्पष्ट गरेको छ । कतिपय राज्यले राति कफ्र्यु लगाएका छन् भने केहीमा आंशिक लकडाउन छ।
कोरोनाभाइरसको संक्रमणबाट निकै प्रभावित राजधानी नयाँ दिल्लीमा आगामी मे १७ सम्म लकडाउन घोषणा गरिएको छ।
भारतको केन्द्रीय स्वास्थ्य तथा परिवार कल्याण मन्त्रालयल अनुसार गत जनवरीबाट शुरु भएको खोप अभियानमार्फत् हालसम्म १७ करोड २० लाख व्यक्ति लाभान्वित भएका छन् । गत मे १ तारिखबाट शुरु भएको तेस्रो चरणको खोप अभियानमा १८ वर्षभन्दा माथिको उमेर समूहका व्यक्तिलाई खोप दिन थालिएको छ।
भारतीय स्वास्थ्य अनुसन्धान परिषदले देशभर हालसम्म ३० करोड नमुना परीक्षण गरिएको जनाएको छ।
प्रतिक्रिया