युनिकोड
स्कटल्यान्डसँगको एक दिवसीय पहिलो अभ्यास खेलमा नेपाल ए टोलीले पहिलो जित दर्ता गरेको छ।
बिहीबार भएको खेलमा नेपाल ए ले स्कटल्यान्डलाई ४५ रनको जित हात पारेको हो।
नेपाल ‘ए’ले दिएको २ सय ७८ रनको लक्ष्य पछ्याएको स्कटल्यान्ड ४८.२ ओभरमा २ सय ३२ रनमा अलआउट भयो।
स्कटल्यान्डलाई कम स्कोरमा रोक्न नेपालका लागि रासिद खानले ३ विकेट लिए। उनले ३.२ ओभरमा २३ रन खर्चे। युवराज खत्री, बसिर अहमद र साहब आलमले समान २ विकेट लिए। कुशल मल्लले एक विकेट आफ्नो नाममा गरे।
स्कटल्यानडका लागि फिन्ले म्याकक्रिथले ५२ रनको योगदान दिए। ज्याक जार्भिसले ४५, मार्क वाटले ३७ म्याथु क्रसले २२ र ब्राण्डोन म्याकमुलेनले २१ रन थपे।
त्यसअघि माथिल्लो मुलपानी क्रिकेट मैदानमा पहिले ब्याटिङ गरेको नेपाल ए टोलीले निर्धारित ५० ओभरमा ८ विकेटको क्षतिमा २ सय ७७ रनको योगफल तयार पारेको थियो। रासिद खान १० बल खेल्दै १४ र दिपक डुम्रे ७ बल खेल्दै २३ रनमा अविजित रहे। डुम्रेले इनिङ्सको अन्तिम ओभरमा लगातार पाँच चौका प्रहार गरे।
पहिलो बल डट खेलेका उनले त्यसपछि लगातार पाँच चौका हान्दै नेपाल ए टोलीलाई उत्कृष्ट फिनिसिङ दिलाए। देव खनाले ६३ रनको योगदान दिए। मयन यादवले ४५, सन्दीप जोराले ३४, पवन सर्राफले ३१ रन बनाए। अनिल शाहले १८ र बसिर अहमदले १७ रन थपे। नारायण जोशी ८ र कुशल मल्ल ३ रनमा आउट भए।
स्कटल्यान्डका लागि ब्राड्ली करी र सफयान सरिफले समान २ विकेट लिए। ज्याक जार्भिस, ओलिभर डाभिसन, ब्रान्डोन म्याकमुलेन र मार्क वार्टले समान एक विकेट लिए।
नेपाल ए टोलीले भोलि शुक्रबार अमेरिकासँग खेल्नेछ।
प्रतिक्रिया