नकआउटको समीकरण पूरा : क्वाटरफाइनल प्रवेशका लागि यी टोली भिड्ने

विश्वकप फुटबलमा सबै समूहका अन्तिम खेल सकिएसँगै नकआउटको समीकरण पूरा भएको छ। नकआउटमा दुई समूहमा ८/८ टोली विभाजन हुनेछन्। 

एउटा समूहमा नेदरल्याण्ड, अमेरिका, अर्जेन्टिना, अष्ट्रेलिया, जापान, क्रोएसिया, ब्राजिल र दक्षिण कोरिया परेका छन्। अर्को समूहमा इङ्ल्याण्ड, सेनेगल, फ्रान्स, पोल्याण्ड, मोरक्को, स्पेन, पोर्चुगल र स्विटजरल्याण्ड छन्। 

यी दुई समूहबाट एक एक टोली फाइनलमा पुग्नेछन्। 

आ आफ्ना खेल जित्दै गए ब्राजिल र अर्जेन्टिनाको भेट सेमिफाइनलमा हुनेछ। फ्रान्स, इङ्ल्याण्ड, स्पेन र पोर्चुगलले पनि नकआउट चरणमा विजयी भए क्वार्टर फाइनलमा भेट हुनेछन्। सेमिफाइनलमा पनि यी टोलीबिच भेट हुने छ। 

नकआउटमा नेदरल्याण्ड्स र अमेरिका भिड्नेछन्। अर्को खेलमा अर्जेन्टिना र अष्ट्रेलियाको भेट हुनेछ। यी दुई खेलका विजेताको भेट क्वार्टर फाइनलमा हुनेछ। 

अर्को खेलमा जापानले क्रोएसियाको सामना गर्दा ब्राजिलले दक्षिण कोरियाको सामना गर्नेछ। जापान र क्रोएसिया तथा ब्राजिल र कोरियाबीचको विजेताबिच क्वार्टर फाइनलमा भेट हुनेछ। 

अर्को खेलमा इङ्ल्याण्ड र सेनेगल तथा फ्रान्स र पोल्याण्ड भिड्नेछन्। यी दुई खेलका विजेताको भेट क्वार्टर फाइनलमा हुनेछ। मोरक्कोले स्पेनको सामना गर्दा पोर्चुगलले स्विट्जरल्याण्डसँग खेल्नेछ। यी दुई खेलका विजेता क्वार्टर फाइनलमा भिड्ने छन्।  

यस्तो छ नकआउट चरणका खेल तालिका

नकआउट चरणका खेल शनिबार रातिदेखि नै सुरु हुनेछन्। पहिलो खेलमा राति ८ः४५ बजे नेदरल्याण्ड्स र अमेरिका भिड्नेछन्। मध्यराति १२ः ४५ बजे अर्जेन्टिना र अष्ट्रेलियाबीचको खेल हुनेछ। यी दुई टोलीका विजेताको भेट क्वार्टर फाइनलमा हुनेछ। 

आइतबार राति ८ः४५ बजे फ्रान्स र पोल्याण्ड भिड्दा राति १२ः४५ बजे इङ्ल्याण्डले सेनेगलको सामना गर्नेछ। यी दुई खेलका विजेताको भेट पनि क्वार्टर फाइनलमा हुनेछ। 

सोमबार राति ८ः४५ बजे जापानले क्रोएसियाको सामना गर्दा राति १२ः४५ बजे ब्राजिल र दक्षिण कोरियाबीच खेल हुनेछ। 

मंगलबार राति नकआउट चरणका दुई खेल भएसँगै क्वार्टरफाइनलमा पुग्ने ८ टोलीको टुंगो लाग्ने छ। अन्तिम रात मोरक्को र स्पेन ८ः४५ बजे भिड्ने छन् भने पोर्चुगल र स्विटजरल्याण्डको खेल राति १२ः४५ बजे हुनेछ। एकै रात हुने दुई खेलका विजेताको भेट क्वार्टरफाइनलमा हुनेछ।

आगामी शनिबार राति ८ः४५ बजे पहिलो क्वार्टर फाइनल खेल हुनेछ।