युनिकोड
हलिउडको पर्दामा आफ्नो दरिलो उपस्थिति जनाइरहेकी ग्लोबल आइकन प्रियंका चोपडाको अभिनय कौशलबाट चर्चित अभिनेता कार्ल अर्बन निकै प्रभावित देखिएका छन्। प्राइम भिडियोको बहुप्रतिक्षित एक्सन-एडभेन्चर ड्रामा ‘द ब्लफ’ मा प्रियंकासँग स्क्रिन सेयर गरेका अर्बनले उनको शारीरिक हाउभाउ र एक्सन दृश्यप्रतिको समर्पणको खुलेर प्रशंसा गरेका हुन्।
‘द लर्ड अफ द रिङ्स’ र ‘द बोइज’ जस्ता विश्वविख्यात फ्रान्चाइजीमा आफ्नो अभिनयको जादू छरिसकेका अर्बनले प्रियंकालाई ‘निस्सन्देह सबैभन्दा उत्कृष्ट’ कलाकारको संज्ञा दिएका छन्। फिल्ममा ‘ब्लडी मेरी’ को उपनामले चिनिने एर्सेल बोडेनको भूमिकामा रहेकी प्रियंकाको ऊर्जालाई उनले 'अतुलनीय' भनेका छन्।
प्रियंकाको कार्यशैली र जोशबारे चर्चा गर्दै अर्बन भन्छन्, “उनीसँग काम गर्नु अत्यन्तै आनन्दको कुरा हो। उनले आफ्नो भूमिकामा जुन किसिमको लगाव र जीवन्तता भरेकी छिन्, त्यसले मलाई लोभ्यायो।” एउटा विशेष एक्सन दृश्यको स्मरण गर्दै अर्बनले थपे, “झ्यालबाट फालिएपछि उनले जसरी सास फेर्न गाह्रो भएको अभिनय गरिन्, त्यो मैले अहिलेसम्म देखेको सबैभन्दा उत्कृष्ट दृश्य हो। साँच्चै भन्नुपर्दा, यो 'सिगर्नी वीभर' स्तरको बेजोड प्रदर्शन थियो।”
दशकौँदेखि एक्सन र युद्ध कलामा पोख्त अर्बन आफैँमा उत्कृष्ट कलाकार हुन्। उनी आफूलाई डार्थ भेडर (बब एन्डर्सन) बाट व्यक्तिगत प्रशिक्षण पाउने भाग्यमानी अभिनेता मान्छन्। “तरवार चलाउनु मेरो रुचि र स्वभाव दुवै हो,” अर्बनले आफ्नो अनुभव साट्दै भनेका छन्, “तर एक्सन भनेको हचुवाको भरमा गरिने काम होइन, यो त पूर्ण समन्वय र अटुट विश्वासको अभ्यास हो, जुन प्रियंकामा प्रस्ट देखिन्थ्यो।”
फ्रान्क इ. फ्लावर्सको निर्देशन र रुस्सो ब्रदर्सको निर्माण रहेको ‘द ब्लफ’ लाई प्रियंका आफैँले पनि निर्माण गरेकी हुन्। यस फिल्ममा उनको विद्रोही र साहसी अवतारले दर्शकलाई नयाँ रोमाञ्च दिने निश्चित छ।
'द ब्लफ' हिजो (बुधबार) देखि अमेजन प्राइम भिडियोमा रिलिज भएको हो। चिनियाँ टीसीएलमा यसअघि नै रिलिज भइसकेको थियो।
प्रतिक्रिया