४ दिनदेखि बेपत्ता सन्तोषीलाई खोज्न गोताखोर परिचालन

चार दिनदेखि बेपत्ता भएकी भरतपुर नर्सिङ अस्पतालमा अध्ययनरत २८ वर्षीया सन्तोषी श्रेष्ठको खोजी कार्य तीव्र पारिएको छ। 

उनको खोजीका लागि बुधबार सशस्त्र प्रहरी बल नेपाल नं. १७ गण चितवनबाट गोताखोर परिचालन गरिएको हो।

तनहुँको बन्दिपुर गाउँपालिका–४ घर भई हाल पूर्वी नवलपरासी गैँडाकोट नगरपालिका–२ मा डेरा गरी बस्ने श्रेष्ठ असार १४ गतेदेखि सम्पर्कविहीन भएकी थिइन्।
 
श्रेष्ठले चलाएको स्कुटर चितवनको देवघाटमा फेला परेको थियो। सो जानकारी पाएपछि सो गणबाट सशस्त्र प्रहरी सहायक निरीक्षकको कमाण्डमा गोताखोरसहितको टोली परिचालन भएको सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिए।